रवि लामिछाने जिल्ला अदालत चितवनको आदेश बदरको माग गर्दै उच्च अदालत पुगे

काठमाडौँ । सञ्चारकर्मी रवि लामिछाने र युवराज कँडेल जिल्ला अदालत चितवनको आदेशविरुद्ध उच्च अदालत गएका छन् । आफूहरुलाई धरौटी तिराउने जिल्ला अदालत चितवनको आदेश बेरितपूर्ण भएको भन्दै बदर गर्न माग गर्दै लामिछाने र कँडेलले आज पाटन उच्च अदालतको हेटौंडा इजलासमा निवेदन दिएका हेटौंडा इजलासका सहरजिष्ट्रार केशर अर्यालले जानकारी दिनुभएको छ ।

पत्रकार शालिकराम पुडासैनीलाई आत्महत्या गर्न दुरुत्साहन गरेको अभियोग लागेका लामिछाने र कँडेललाई जिल्ला अदालत चितवनले क्रमशः पाँच लाख र तीन लाख रुपैयाँ धरौटीमा रिहा गरेको थियो । अर्यालका अनुसार निवेदनमा लामिछाने र कँडेलले आफूहरुले आत्महत्या दुरुत्साहन नगरेकाले साधारण तारिखमा रिहा हुनुपर्ने र विदेश जान प्रतिबन्ध लगाउन नहुने जिकिर गरिएको छ।

जिल्ला अदालत चितवनका न्यायाधीश हेमन्त रावलको इजलासले सोही मुद्दामा पक्राउ परेकी अस्मिता भनिने रुकु कार्कीलाई साधारण तारेखमा छोडेको थियो । सरकारी वकिलको कार्यालयले लामिछानेसहित तीनै जनालाई पाँच वर्ष जेल र ५० हजार जरिवाना माग गर्दै मुद्दा दायर गरेको थियो।

चितवनको नारायणगढस्थित एक होटलमा झुण्डिएको अवस्थामा फेला परेका पुडासैनीले आत्महत्याअघि आफ्नो मोवाइलमा रेकर्ड गरेको भिडियोमा रवि लामिछाने, युवराज कँडेल र रुकु कार्कीको कारण आफू मर्नुपरेको बताएका थिए। पछिल्लो समय माउण्टेन टेलिभिजनमा कार्यरत पुडासैनीले त्यसअघि न्युज २४ टेलिभिजनमा लामिछानेले चलाउँदै आएको सिधाकुरा जनतासँग कार्यक्रममा रिपोर्टिङ गर्दथे ।