भरतपुरमा बसको ठक्करबाट युवकको मृत्यु, ठक्कर दिने बस हेटौँडाबाट समातियो

चितवन । बसको ठक्करबाट चितवनमा एक युवकको मृत्यु भएको छ । ठक्कर दिने बस भने हेटौँडाबाट समातिएको छ ।

ना६ख ७६८७ नंको बसले आज बिहान २ः४० बजे भरतपुर महानगरपालिका–१ आँपटारीमा ठक्कर दिँदा पैदलयात्री रोशन अधिकारीको घटनास्थलमै मृत्यु भएको हो । मृतक २७ वर्षीय अधिकारी गोर्खा पालुङटार नगरपालिका–१३ का रहेको जिल्ला प्रहरी कार्यालय चितवनले जनाएको छ ।

अधिकारीलाई ठक्कर दिई भागेको बसलाई मकवानपुरबाट नियन्त्रणमा लिई अनुसन्धान शुरु गरिएको प्रहरीले जनाएको छ ।

त्यस्तै, पूर्वी चितवनको कालिका नगरपालिका र रत्ननगर नगरपालिकाको सिमानामा पर्ने नमस्तेचोकमा एक पुरुषको शव फेला परेको छ । सनाखत हुन नसकेका अन्दाजी ६५ वर्षीय वृद्धको शव फेला परेको प्रहरीले जनाएको छ । शव परीक्षणका लागि भरतपुर अस्पतालमा राखिएको छ ।