नारायणगढ–मुग्लिन सडक खण्डमा बस र ट्रक ठोक्किँदा ११ घाईते

चितवन, १० पुस । नारायणगढ–मुग्लिन सडक खण्डको भतेरी जंगलमा आज शनिबार बस र ट्रक एकआपसमा ठक्कर खाँदा ११ जना घाईते भएका छन् । वीरगञ्जबाट काठमाण्डौ तर्फ गई रहेको बा ३ ख ९६७९ नम्बरको बस र बिपरित दिशाबाट आई रहेको ना ६ ख ५८६६ नम्बरको ट्रक एक आपसमा ठक्कर खाँदा दुर्घटना भएको हो ।

जिल्ला प्रहरी कार्यालय चितवनले न्यूजभित्तोलाई दिएको जानकारी अनुसार घाईते १० जनाको कलेज अफ मेडिकल साईन्सेस शिक्षण अस्पताल (पुरानो मेडिकल कलेज) र ट्रकका चालकको भरतपुर अस्पतालमा उपचार भईरहेको छ । घाईते मध्ये एक जनाको अवस्था गम्भीर रहेको प्रहरीले जनाएको छ ।

भरतपुर महानगरपालिका वडा नं. २९ स्थित भतेरी जंगलमा दिउँसो २ः४५ बजेको समयमा दुर्घटना भएको हो । दुर्घटनापछि अवरुद्ध रहेको सडक ३ः५ बजेबाट नियमित भएको छ । क्रेनको सहायता दुर्घटनामा परेका सवारी हटाएर यातायात सुचारु गरिएको प्रहरीले जनाएको छ ।