शुभचिन्तककाबीच रवि लामिछानेले भने– ‘सर्पले ठुङ्न मात्र सक्छ, हामीसँग धेरै विकल्प छन्’

नारायणगढ । पत्रकार शालिकराम पुडासैनीलाई आत्महत्याका लागि दुरुत्साहन गरेको मुद्धामा अदालतको आदेशले धरौटीमा रिहा भएका सञ्चारकर्मी रवि लामिछाने र युवराज कँडेलले सभा गरेरै आफ्ना शुभेच्छुक, शुभचिन्तकहरुलाई धन्यवाद दिएका छन् ।

नारायणी नदी किनारको मैदानमा आज दिउँसो आयोजित कार्यक्रममा उनीहरुले आफ्ना शुभेच्छुक, शुभचिन्तकहरुलाई धन्यवाद दिएका हुन् । हजारौँ शुभचिन्तककाबीच उनीहरुले सधैँ नागरिकको पक्षमा अडिग रहेर सञ्चारकर्ममा खटिरहने प्रतिबद्धता जनाए । पक्राउ परेदेखिनै उनीहरुका शुभेच्छुकहरुले रिहाईको माग राख्दै चितवनमा लगातार प्रदर्शन जारी राखेका थिए ।

सञ्चारकर्मी लामिछानेले आफुहरुलाई माया गर्ने नागरिकको शीर झुक्न नदिई नागरिकका आवाज बुलन्द पार्ने बताए । उनले राजनीतिक नेतृत्वको इमान्दारीतामा कञ्जुस्याइँ रहेकोले सञ्चारकर्मीहरुले उनीहरुलाई सचेत बनाउनुपर्ने धारणा राखे । लामिछानेले सम्मानित अदालतको आदेश शिरोधार्य गर्ने पनि बताए ।

लामिछानेले अदालतले आफुलाई एउटा विषयमा मात्रै नबोल्नु भनेको र देशमा धेरै बेथिति रहेकाले आफ्नो टेलिभिजन कार्यक्रमको आवाज यसअघि भन्दा अझै बुलन्द हुने बताए ।

उनले सांकेतिक रुपमा भने– ‘सर्पले ठुङ्न मात्र सक्छ, तर हामीसँग लौरोले हिर्काउने, लात्ताले हान्ने जस्ता धेरै विकल्प छन् ।’

‘मलाई के जरुरत थियो यस्ता घिनलाग्दा मानिसहरुसँग लड्ने, टेलिभिजन कार्यक्रममा बोल्ने मेरो आवाज होइन तपाईंहरुको आवाज हो’ लामिछानेले भने ।

उनले भनेका छन् – यो शुरुवात मात्र हो, अन्त्य होइन ।

उनले आउने शनिबारबाट आफ्नो सीधा कुरा जनतासँग कार्यक्रम शुरु गर्ने बताए ।

कार्यक्रममा अर्का पत्रकार युवराज कँडेलले आफ्ना दर्शकका आशामाथि विश्वासघात नगर्ने बताए । उनले पत्रकारिताको धर्मबाट पछाडि नहट्ने र सधैँ जनताको पक्ष लिइरहने प्रतिवद्धता जनाए ।