पत्रकार गिरीलाई सफाइ, भन्छन्– ‘पत्रकारितामाथि धावा बोल्नेहरुलाई चेतना भया’

पोखरा । साइबर अपराधको मुद्दा खेपिरहेका पत्रकार अर्जुन गिरीले अदालतबाट सफाइ पाउनुभएको छ । जग्गा कारोवारमा कास्कीको पोखराका व्यवसायीबाट ठगिएका दुई जनाको पीडालाई समेटेर समाचार बनाएपछि गिरीले व्यवसायीको मुद्दा खेप्दै आउनुभएको थियो ।

चार महिनापछि काठमाडौँ जिल्ला अदालतले सो मुद्दाको छिनोफानो गरेको हो । न्यायाधीश विनोदकुमार पोखरेलको एकल इजलासले गिरीलाई सफाइ दिएको हो । गिरीका विरुद्ध विपिन बतासले साइबर अपराध सम्बन्धी मुद्दा दायर गरेका थिए । विसं २०७६ वैशाख २ गते जिल्ला प्रहरी कार्यालय कास्कीको टोलीले गिरीलाई पक्राउ गरी काठमाडाँै लगेको थियो । गिरीको पक्षमा वरिष्ठ अधिवक्ता बोर्णबहादुर बोहरा र अधिवक्ता भक्तिराम घिमिरेले बहस गर्नुभएको थियो । यसअघि गिरीको पक्षमा अधिवक्ता स्वागत नेपालले पैरवी गर्नुभएको थियो ।

   सफाइ पाएपछि गिरीको प्रतिक्रिया :

अन्ततः साइबर क्राइम मुद्दामा काठमाडौं जिल्ला अदालतले मलाई सफाइ दिएको छ । न्यायको मन्दिरप्रति आभारी छु । र, आभारी छु ती सबै अग्रज र सहकर्मी देशैभरिका पत्रकारहरुप्रति जजसले मेरो पक्षमा आवाज उठाउनुभयो । पत्रकार महासंघको आह्वानमा भएको आन्दोलनमा खटिनुभयो ।

हामीले भन्दै आएकै हौं पत्रकारिता साइबर अपराध होइन । अन्ततः अदालतले त्यही प्रमाणित गरिदिएको छ । जस्केलाबाट छिरेर पत्रकारितामाथि धावा बोल्नेहरुलाई चेतना भया ।