प्रदर्शनकारीको ढुङ्गा प्रहारबाट डिएसपीसहित चार प्रहरी घाइते, प्रदर्शनकारीलाई प्रहरीले अश्रुग्याँस प्रहार गरी तितरबितर पार्यो (अपडेट)

चितवन । प्रहरीले रवि लामिछानेसमर्थक प्रदर्शनकारीलाई तितरबितर पार्न झण्डै दुई दर्जन अश्रुग्याँस प्रहार प्रहार गरेको छ । जिल्ला प्रहरी कार्यालय चितवन अगाडि विहानैदेखि प्रदर्शन गरिरहेका प्रदर्शनकारीमाथि प्रहरीले आज साँझ पौने ६ बजे अश्रुग्याँस प्रहार गरेको हो । अश्रुग्याँस प्रहार गरेपछि प्रदर्शनकारीहरु तितरबितर भएका थिए।

प्रदर्शनकारीहरुले विहानैदेखि लामिछानेको पक्षमा नाराबाजी गर्दै प्रदर्शन गरिरहेका थिए । प्रदर्शनकारीको भीडबाट ढुङ्गा हानिएपछि उनीहरुलाई तितरबितर पार्न अश्रुग्यास प्रहार गर्नुपरेको प्रहरीले बताएको छ ।

प्रहरीले अश्रुग्याँस प्रहार गरेर लखेटेपछि लामिछाने समर्थकहरुले भरतपुरको चौबिसकोठी र त्रिचोकमा टायर बालेर प्रदर्शन गरेका थिए । 

यसैबीच, प्रदर्शनकारीको ढुङ्गा प्रहारबाट प्रहरी नायव उपरीक्षक (डिएसपी)सहित चारजना घाइते भएका छन् । घाइते हुनेमा डिएसपी एकनारायण कोइराला, इन्सपेक्टर देवराज शर्मा, एक जना असई र एकजना प्रहरी जवान रहेका जिल्ला प्रहरी कार्यालय, चितवनले जानकारी दिएको छ ।