रवि लामिछानेसहित तीनै जना आज पनि प्रहरी हिरासतमा, अस्मिताको बयान सकियो, रवि र युवराजको बयान भोलि

चितवन । टेलिभिजन कार्यक्रम प्रस्तोता रवि लामिछानेसहित तीन जना विरुद्ध जिल्ला अदालत चितवनमा मुद्दा दायर भएको छ । लामिछानेसहित युवराज कँडेल र अस्मिता भनिने रुकु कार्की विरुद्ध जिल्ला सरकारी वकिल कार्यालय चितवनले आईतबार मुद्दा दर्ता गराएको हो ।

जिल्ला अदालत चितवनका श्रेष्तेदार रुद्रमणि गिरीका अनुसार अस्मिता भनिने रुकु कार्कीको बयान सकिएको छ भने बाँकी दुई जनाको समय अभावका कारण बयान लिन बाँकी रहेको छ । उनीहरुको बयान सोमबार १० बजेबाट शुरु हुने गिरीले बताउनुभयो । उनीहरुको बयान सम्पन्न भएपछि थुनछेक बहस हुने उहाँले जानकारी दिनुभयो ।

मुलुकी अपराध संहिता २०७४ को दफा १७७ र दफा १८५ को १ र २ को कसुरमा तीनै जना प्रतिवादीलाई दफा १८५ को २ अनुसार सजाय माग गरिएको छ । सो दफामा पाँच वर्षसम्म कैद र रु.५० हजारसम्म जरिवाना वा दुवै गर्न सकिने व्यवस्था रहेको छ । जिल्ला न्यायाधिश हेमन्त रावलको ईजलासमा उक्त मुद्दा रहेको छ ।

यसअघि प्रहरीले अनुसन्धानमा जुटेका प्रमाणसहित उनीहरुलाई आईतबार जिल्ला सरकारी वकिल कार्यालय चितवनमा बुझाईएको थियो । उनीहरुलाई सरकारी वकिलको कार्यालयमा पेश गरिए लगत्तै जिल्ला प्रहरी कार्यालय चितवनले पत्रकार सम्मेलनको आयोजना गरी अनुसन्धानका विषयमा जानकारी गराएको छ । सो अवसरमा यस घटनालाई अनुसन्धान गर्न खटिनु भएका केन्द्रीय अनुसन्धान व्यूरोका प्रहरी उपरीक्षक (एसपी) दिपक रेग्मीले आफ्ना तर्फबाट अनुसन्धानको काम सम्पन्न गरी सरकारी वकिलको कार्यालय पठाईएको जानकारी दिनुभयो ।

अनुसन्धानका क्रममा सो घटनामा आत्महत्या गर्न दुरुत्साहन गरिएको प्रमाणहरु भेटिएसँगै सोहि अनुरुप प्रमाणहरु पेश गरिएको रेग्मीले बताउनु भयो । सरकारी वकिल कार्यालय र अदालतले थप प्रमाणहरु माग गरेमा सोहि अनुसार कामलाई अघि वढाईने उहाँको भनाई थियो । अनुसन्धानका क्रममा भिडियो बाहेकका प्रमाणहरु पनि जुटेका भए पनि सार्वजनिक गर्न नमिल्ने रेग्मीले बताउनु भयो ।

एक सातादेखि आफुले बाह्य प्रभावमा नपरी निस्पक्ष ढङ्गबाट घटनाको अनुसन्धान गरेको उहाँले बताउनुभयो । भिडबाट न्याय खोज्ने परम्परालाई निरुत्साहित गरी न्यायालयबाट न्याय खोज्ने परम्परा थाल्नु पर्ने उहाँले बताउनुभयो ।

घटना भएपछि प्रहरी प्रधान कार्यालयले आफुलाई अनुसन्धानका लागि खटाएको र सोहि अनुरुप आफ्नो काम सम्पन्न गरेको रेग्मीको भनाई थियो । तीन जना प्रतिवादीहरुको दोष फरक फरक देखिएको भन्दै यसको विभाजन अदालतले गर्ने रेग्मीले बताउनु भयो ।

प्रहरीले लामिछानेसहित तीन जनालाई पक्राउपछि दोस्रो पटक माग गरेको समय शनिवार सम्पन्न भएको थियो ।

साउन २० गते राती नारायणगढको एक होटलमा पत्रकार शालिकराम पुडासैनी झुण्डिएको अवस्थामा भेटिएका थिए । सो पश्चात अनुसन्धानको क्रममा भेटिएको भिडियोमा तीन जनाका कारण आफुले आत्महत्या गर्न वाध्य भएको उल्लेख गरेपछि लामिछाने सहित तीन जनालाई साउन ३० गते प्रहरीले काठमाडौंवाट पक्राउ गरेको थियो ।

उनीहरु पक्राउसँगै समर्थकहरुले रिहाई गर्नु पर्ने माग गर्दै दिनहुँ यहाँ प्रदर्शन गरिरहेका छन् । गत वर्षको भदौमा लागू भएको नयाँ कानुनमा आत्महत्या गर्न बाध्य पार्नेलाई कारवाहि हुने व्यवस्था रहेको छ । आत्महत्या दुरुत्साहनमा पाँच वर्ष सम्म कैद र रु ५० हजार सम्म जरिवाना हुने व्यवस्था छ । यस अघि यसै प्रकारका ६ वटा मुद्दा जिल्ला अदालत चितवनमा दर्ता भईसकेका छन् ।

साउन २० गते बेलुका भरतपुर महानगरपालिका वडा नं. १ पोखरा बसपार्कस्थित कंगारु होटलमा पत्रकार शालिकराम पुडासैनी झुण्डिएको अवस्थामा मृत भेटिएका थिए । पुडासैनीको मोबाईलमा भेटिएको भिडियोमा आरोपी तीन जनाका कारण आफुले आत्महत्या गर्न बाध्य भएको उल्लेख छ । सो पश्चात लामिछानेसहित तीन जनालाई प्रहरीले साउन ३० गते काठमाडौंबाट पक्राउ गरेको थियो ।

उनीहरु पक्राउसँगै समर्थकहरुले रिहाई गर्नु पर्ने माग गर्दै दिनहुँ यहाँ प्रदर्शन गरिरहेका छन् । आईतबार हजारौं समर्थकहरुले भरतपुरको चौबीसकोठी, जिल्ला प्रहरी कार्यालय अगाडि, वाईपास रोड लगायतका ठाउँमा प्रदर्शन गरेका थिए । प्रदर्शनमा महिलाहरुको सहभागिता बढी देखिन्थ्यो । भरतपुरको मुख्य शहरी क्षेत्रकाभन्दा ग्रामीण क्षेत्रका वासिन्दाहरु प्रदर्शनमा धेरै सहभागी भएका थिए । प्रदर्शनमा सहभागी हुन विभिन्न जिल्लाबाट प्रदर्शनकारीहरु यहाँ आएका छन् । आईतबार अदालतले रविलाई रिहा गर्ने अपेक्षासहित फूलमाला लिएर आएका प्रदर्शनकारीहरु भने निराश देखिन्थे ।

साँझपख प्रहरीले प्रदर्शनकारीहरुलाई तितरवितर गर्न दर्जनौं सेल अश्रुग्यास प्रहार गरेको छ । सो क्रममा प्रदर्शनकारीहरुले ढुंगा प्रहार गरेका थिए ।

(तस्वीर : जिल्ला प्रहरी कार्यालय चितवन अगाडि आईतबार प्रदर्शन गर्दै रवि लामिछाने समर्थकहरु ।)