पत्रकार पुडासैनी मृत्यु प्रकरण : सिआईबीका एसपी भन्छन्– ‘आत्महत्या गर्न दुरुत्साहन गरिएका भिडियो बाहेकका प्रमाण पनि जुटेका छन्’

चितवन । पत्रकार शालिकराम पुडासैनीको मृत्यु प्रकरणमा अनुसन्धानमा खटिएका प्रहरीको केन्द्रिय अनुसन्धान ब्यूरो (सिआईबी)का प्रहरी उपरीक्षक दिपक रेग्मीले आफ्नो तर्फबाट अनुसन्धानको काम सम्पन्न गरि सरकारी वकिलको कार्यालय पठाईएको जानकारी दिनु भएको छ । पत्रकार शालिकराम पुडासैनी मृत्यु प्रकरणमा पक्राउ परेका सञ्चारकर्मी रवि लामिछाने, युवराज कँडेल र स्टाफ नर्स अस्मिता भनिने रुकु कार्कीमाथि प्रहरीले अनुसन्धान सकेर आज विहान सरकारी वकिलको कार्यालयमा पेश गरेको हो ।

जिल्ला प्रहरी कार्यालय, चितवनले आज आयोजना गरेको पत्रकार सम्मेलनमा रेग्मीले अनुसन्धानका क्रममा सो घटनामा आत्महत्या गर्न दुरुत्साहन गरिएको प्रमाणहरु भेटिएसँगै सोही अनुरुप प्रमाणहरु पेश गरिएको बताउनु भयो । उहाँका अनुसार सरकारी वकिलको कार्यालय र अदालतले थप प्रमाणहरु माग गरेमा सोहि अनुसार कामलाई अघि बढाईने छ । यद्यपी अनुसन्धानका क्रममा भिडियो बाहेकका प्रमाणहरु जुटेका भएपनि सार्वजनिक गर्न नमिल्ने रेग्मीले बताउनु भयो ।

एक साता देखि आफुले निष्पक्ष ढङ्गबाट घटनाको अनुसन्धान गरेको भन्दै प्रहरी उपरीक्षक रेग्मीले वाह्य प्रभाव आफुले थेग्नु नपरेको बताउनु भयो । उहाँले भन्नुभयो “भीडबाट न्याय खोज्ने परम्परालाई निरुत्साहित गरि न्यायालयबाट न्याय खोज्ने परम्परा थाल्नुपर्छ ।” घटना भएपछि प्रहरी प्रधान कार्यालयले आफुलाई अनुसन्धानका लागि खटाएको र सोहि अनुरुप आफ्नो काम सम्पन्न गरेको रेग्मीको भनाई छ ।

उहाँले यस मुद्धामा तीन जना प्रतिवादीहरुको दोष फरक फरक देखिएको भन्दै यसको विभाजन अदालतले गर्ने बताउनु भयो । सरकारी वकिल कार्यालयले आज जिल्ला अदालतमा मुद्धा दर्ता गर्ने तयारी गरेको छ । सरकारी वकिलको कार्यालयमा विहान १० बजेनै प्रहरीले प्रमाण सहितको फाईल र अभियुक्तहरुलाई पेश गरेको छ ।