डेङ्गुले चितवनमा एक जनाको ज्यान गयो

चितवन । चितवनमा डेङ्गुको सङ्क्रमणबाट एक जनाको मृत्यु भएको छ । मृत्यु हुनेमा भरतपुर महानगरपालिका वडा नम्वर २, गंगोत्री मार्गका एक ७१ वर्षीय पुरुष रहेका स्वास्थ्य कार्यालय चितवनले जनाएको छ ।

स्वास्थ्य कार्यालय चितवनका किट नियन्त्रक राम केसीका अनुसार उनको चितवन मेडिकल कलेजमा उपचारका क्रममा साउन ३१ गते मृत्यु भएको हो । मृतकको नाम गोप्य राखिएको छ । सामान्य ज्वरो आएर साउन २९ गते भरतपुर सामुदायिक अस्पतालमा उपचार गराउन गएका उनको त्यहाँ उपचार हुन नसके पछि चितवन मेडिकल कलेजमा पठाईएको थियो । सोहि मेडिकल कलेजमा उपचारका क्रममा उनको मृत्यु भएको केसीले जानकारी दिनु भयो ।

जिल्लामा केहिदिन यता डेंगुको संक्रमण बढ्दै गएको छ । उहाँका अनुसार साउन यता भदौ ६ गतेसम्म जिल्लामा ५ सय ६७ जनाको परीक्षण गरिएकोमा २ सय २५ जनामा डेंगुको संक्रमण भेटिएको छ । ती मध्ये ४० प्रतिशत भरतपुर महानगरपालिकाका रहेका उहाँले जानकारी दिनु भयो । डेंगु नियन्त्रणका लागि लार्भा खोज र नष्ट गर अभियान सम्पन्न गरि जनचेतनामूलक कार्यक्रम तीब्र पारिएको उहाँको भनाई छ ।