रवि लामिछानेसहित तीनजनालाई सरकारी वकिलको कार्यालयमा पेश गरियो, आजै अदालतमा अभियोगपत्र पेश हुने

चितवन । पत्रकार शालिकराम पुडासैनी मृत्यु प्रकरणमा पक्राउ परेका सञ्चारकर्मी रवि रामिछाने, युवराज कँडेल र स्टाफ नर्स अस्मिता भनिने रुकु कार्कीमाथि प्रहरीले अनुसन्धान सकेर आज विहान सरकारी वकिलको कार्यालयमा पेश गरेको छ । उनीहरुलाई अनुसन्धानको प्रकृया टुङ्ग्याई सरकारी वकिलको कार्यालयमा पेश गरिएको जिल्ला प्रहरी कार्यालय चितवनका प्रमुख प्रहरी उपरीक्षक दानबहादुर मल्लले जानकारी दिनुभएको छ ।

सरकारी वकिलबाट आजै अदालतमा अभियोगपत्र पेश हुने पनि प्रहरी उपरीक्षक मल्लले बताउनुभएको छ । न्यायिक हिरासतमा रहेका तीनै जनालाई चितवन जिल्ला अदालतले दोस्रो पटक थप गरेको पाँच दिनको समय अवधिभित्रै सवै अनुसन्धान सकेर अनुसन्धान राय प्रतिवेदन सहितको फाईल सरकारी वकिलको कार्यालयमा पेश गरिएको चितवन प्रहरीले बताएको छ ।

सरकारी वकिलको कार्यालयले अदालतमा अभियोगपत्र पेश गरेपछि आजै थुनछेक बहस हुने छ । थुनछेक बहसपछि अदालतले रिहा गर्ने वा कारागार चलान गर्ने आदेश दिनेछ । अदालतले आजै वा भोलि आदेश दिनसक्ने सम्भावना रहेको बताइएको छ । जाहेरीवालाको तर्फबाट पाँच जना अधिवक्ताले बहस गर्ने तयारी गरेका छन् ।

प्रतिवादीका तर्फबाट वरिष्ठ अधिवक्ता सुशील पन्त, अधिवक्ता सुनिल पोखरेल र चुडामणी सापकोटाले बहस गर्नेछन । त्यस्तै अस्मिता कार्कीको तर्फबाट पनि छुट्टै तीन जना अधिवक्ताले बहस गर्ने तयारी गरेका छन् ।

माउन्टेन टेलिभिजनमा कार्यरत पत्रकार पुडासैनी गएको साउन २० गते भरतपुरको नारायणगढस्थित एक होटलमा मृत फेला परेका थिए । उनले मृत्युअघि रेकर्ड गरेको भिडियोमा रवि, युवराज र अस्मितालाई दुरुत्साहनको आरोप लगाएको भेटिएपछि उनीहरु तिनै जनालाई प्रहरीले साउन ३० गत्ते काठमाडौँबाट पक्राउ गरि चितवन ल्याएको थियो ।