चितवनको फिस्लिङमा ट्रक र ट्याक्सी जुध्दा एकको मृत्यु, चार घाइते

चितवन । पृथ्वी राजमार्गको इच्छाकामना गाउँपालिका–३ फिस्लिङमा ट्रक र ट्याक्सी एक आपसमा ठक्कर खाँदा एक जनाको मृत्यु भएको छ भने एकै परिवारका चार जना घाइते भएका छन् । मृत्यु हुनेमा काभ्रेको बनेपा नगरपालिका–१० वस्ने ६४ वर्षीया राधिकादेवी बराल रहेको प्रहरीले जनाएको छ ।

जिल्ला प्रहरी कार्यालय चितवनका अनुसार नारायणगढबाट काठमाडौँतर्फ जाँदै गरेको भारतीय नम्बर प्लेटको ट्रकले काठमाडौँबाट मुग्लिनतर्फ आउँदै गरेको ट्याक्सीलाई ठक्कर दिएको थियो । एच आर ५८ ए ८१०२ नम्बरको ट्रकले बा२ज २५४ नम्बरको ट्याक्सीलाई आज दिउँसो ठक्कर दिएको थियो । बरालको पुरानो मेडिकल कलेजमा उपचारका क्रममा साँझ मृत्यु भएको हो ।

घाइते हुनेमा सोही स्थानका ३९ वर्षीय नारायण बराल, ६४ वर्षीया सीतादेवी अधिकारी, ३९ वर्षीया चन्द्रकला अधिकारी र ७२ वर्षीय बाबुराम अधिकारी रहेको प्रहरीले जनाएको छ । तीमध्ये सीतादेवीको अवस्था गम्भीर रहेको छ । दुवै सवारी साधन र ट्रकका चालक नियन्त्रणमा रहेको प्रहरीले जनाएको छ ।