प्रधानमन्त्री ओली स्वास्थ्य उपचारका लागि सिङ्गापुर प्रस्थान

काठमाडौँ । प्रधानमन्त्री केपी शर्मा ओली स्वास्थ्य उपचारका लागि पुनः आज दिउँसो सिङ्गापुर प्रस्थान गर्नुभएको छ । प्रधानमन्त्री ओली थाइ एयरको विमानबाट सिङ्गापुर जानुभएको हो । प्रधानमन्त्रीको साथमा उहाँकी धर्मपत्नी राधिका शाक्यलगायत सहयोगी, निजी चिकित्सक र सुरक्षाकर्मी रहेका छन् ।

प्रधानमन्त्रीका निजी चिकित्सक डा. दिब्या सिंहले प्रधानमन्त्रीको मृगौलासम्बन्धी ‘एण्टीबडी’को मात्रा केही बढी देखिन गएको र एण्टीबडीलाई शरीरबाट निस्कासन गरी निराकरण गर्ने उपचार विधिलाई निरन्तरता दिन उहाँ फेरि त्यसतर्फ जानुभएको जानकारी दिनुभएको छ ।

सिङ्गापुरको नेशनल युनिभर्सिटी अस्पतालमा नेपाली चिकित्सकका साथमा त्यहाँका विज्ञहरुको टोलीले प्रधानमन्त्रीको ‘मिर्गौलाको थप परीक्षण र क्षमता अभिवृद्धिका लागि आवश्यक उपचारसमेत गर्ने’ डा. सिंहले बताउनुभएको छ ।

अघिल्लो पटक गएको साउन १८ देखि २७ गतेसम्म सोही अस्पतालमा प्रधानमन्त्रीको स्वास्थ्य परीक्षण भएको थियो ।

   प्रधानमन्त्रीको कार्यभार पोखरेललाई

राष्ट्रपति विद्यादेवी भण्डारीले प्रधानमन्त्री केपी शर्मा ओली स्वास्थ्य परीक्षणका लागि सिङ्गापुर प्रस्थान गर्नुभएकाले उहाँको अनुपस्थितिमा उपप्रधानमन्त्री ईश्वर पोखरेललाई प्रधानमन्त्रीको कार्यभार सम्हाल्न तोक्नुभएको छ ।

राष्ट्रपति भण्डारीले नेपालको संविधानबमोजिम प्रधानमन्त्रीको सिफारिशमा प्रधानमन्त्रीले गर्ने दैनिक प्रशासनिक कार्य उपप्रधानमन्त्री पोखरेलले सम्हाल्ने गरी तोक्नुभएको राष्ट्रपतिको कार्यालयले आज जारी गरेको विज्ञप्तिमा जनाइएको छ ।