रवि लामिछानेसहित तीन जना विरुद्ध आत्महत्या दुरुत्साहन अन्तर्गत किटानी जाहेरी

चितवन । पत्रकार शालिकराम पुडासैनी मृत्यु प्रकरणमा  कार्यक्रम प्रस्तोता रवि लामिछाने सहित तीन जना विरुद्ध आईतबार किटानी जाहेरी परेको छ । पुडासैनीको परिवारले महानगरीय प्रहरी परिसर काठमाडौं मार्फत लामिछाने सहित पक्राउ परेका युवराज कँडेल र अस्मिता कार्की बिरुद्ध किटानी जाहेरी दिएको हो । मृतककी श्रीमती सम्झना घिमिरे पुडासैनीले आफै उपस्थित भएर उजुरी दिनुभएको हो ।

किटानी जाहेरीमा आफ्ना श्रीमानलाई लामिछाने, कँडेल र कार्कीले हत्याको बाटो रोज्न बाध्य पारेकाले उनीहरुमाथि मुलुकी अपराध संहिताको आत्महत्या दुरुत्साहनअन्तर्गत कारवाही गर्न माग गरेको पारिवारिक स्रोतले जनाएको छ ।

घटना भएको १४ औं दिनमा किटानी जाहेरी परेको हो । यस अघि परिवारले सत्य तथ्य पत्ता लगाई दोषीलाई कारवाही गरी पाउँ भन्ने निवेदन जिल्ला प्रहरी कार्यालय चितवनमा दर्ता गराएको थियो ।

जिल्ला प्रहरी कार्यालय चितवनका प्रमुख एसपी दानबहादुर मल्लले काठमाण्डौंमा उजुरी परेको तर आफूहरुलाई आधिकारिक रुपमा आईनसकेको बताउनुभयो ।