मेरुदण्डको चोटका कारण थलिएका खड्कालाई ह्विलचेयर र खाद्यान्न सहयोग

माडी २५ असोज । मचानबाट खसेर मेरुदण्डको चोटका कारण थलिएर घरमै बसिरहनुभएको विपन्न बिरामी श्यामकुमार खड्कालाई ह्विलचियर र खाधान्न उपलब्ध गराइएको छ । विजय खनालको नेतृत्वदायी संयोजन र बे एरिया नेपालिज् कम्युनिष्ट ईन फर्मेन्ट युएसए (Bay Area Nepalese community in Fremont, USA) मा संगठित साथीहरु विजय खनाल, शैलेन्द्र आचार्य, शंकर घिमिरे, सुदिप भट्टराई लगायत संस्थामा संगठित साथीहरु र डा सुवास बस्नेतको आर्थिक सहयोगमा घाइते श्यामकुमार खड्कालाई सहयोग उपलब्ध गराइएको हो ।

सहयोगीहरुले उपलब्ध गराएको सहयोग घाइते श्यामकुमार खड्कालाई हस्तान्तरण गर्दै माडी नगरपालिकाका उपप्रमुख ताराकाजी महत्तोले समस्यामा धैर्य गर्न श्यामकुमार खड्कालाई आग्रह गर्नुभयो । उहाँले विपत्तिको समयमा सहयोग गर्ने सहयोगीहरुप्रति हार्दिक धन्यवाद ज्ञापन गर्नुभयो ।

सहयोगीहरुले उपलब्ध गराएको सहयोग ग्रहण गर्दै घाइते श्यामकुमार खड्काले समस्याको बेलामा सहयोग उपलब्ध गराउने विजय खनाल, शैलेन्द्र आचार्य, शंकर घिमिरे, सुदिप भट्टराई लगायत उक्त संस्थामा संगठित साथीहरु र डा सुवास बस्नेतप्रति हार्दिक आभार व्यक्त गर्दै दशैंको शुभकामनासहित उत्तरोत्तर प्रगतिको कामना गर्नुभयो ।

चितवन जिल्ला, माडी नगरपालिकामा वडा नं ९ बाँदरझुला निवासी ५२ वर्षिय श्यामकुमार खड्का मेरुदण्डको चोट (स्पाईनल इन्जुरी) का कारण थलिएर घरमै बसिरहनुभएको छ । २०७८ जेठ १९ गते खेतीबाली कुर्ने मचान बनाउने क्रममा मचानबाट लडेर मेरुदण्डमा चोटलागेपछि घरमा नै थलिएर बस्नुभएको हो ।उहाँले आर्थिक अभावका कारण थप उपचार गर्न पनि सक्नुभएको छैन। सहयोग उपलब्ध गराउने कार्यक्रमको संयोजन नारायण सापकोटाले गर्नुभएको थियो ।