छोराछोरीसहित नदीमा हामफाल्ने आमाको उद्धार, छोराछोरीको मृत्यु

कावासोती । आफ्ना दुई छोराछोरीसहित नारायणी नदीमा हामफालेकी एक महिलाको उद्धार गरिएको छ । तर उनका दुई छोराछोरीको भने मृत्यु भएको छ ।

नवलपरासीपूर्व विनयी त्रिवेणी गाउँपालिका–७ ब्यारेज पुलस्थित छाताचोकबाट पाल्हिनन्दन गाउँपालिका–५ बस्ने सुधा विश्वकर्माले छोराछोरीसहित नारायणी नदीमा हामफालेकी हुन् । घटनामा सुधाका छोरा साढे दुई वर्षीय अभिनाथ विश्वकर्मा र डेढ महीनाकी छोरी निकिता विश्वकर्माको मृत्यु भएको छ ।

आमा २४ वर्षीय सुधा विश्वकर्मालाई भने स्थानीयवासीले उद्धार गरेका छन् । सुधा प्रहरी नियन्त्रणमा रहेको जिल्ला प्रहरी कार्यालय नवलपरासीपूर्वका प्रहरी निरीक्षक राजेन्द्र अधिकारीले बताउनुभयो । आमा स्वयम्ले दुवै बच्चा साथमा लिएर नारायणी नदीमा हामफालेकी थिइन् ।

सुधाका श्रीमान प्रहरी युक्ती तालीम महाविद्यालय जर्गाहा नवलपरासीमा कार्यरत रहेका छन् । घटनाको बारेमा थप अनुसन्धान भइरहेको प्रहरी निरीक्षक अधिकारीले बताउनुभयो ।