’तोरी खायो मौरी’ लेवोलको गित युटुववाट हटाउन महासंघको आग्रह

चितवन,२७ भदौ । नेपाल मौरी पालक महासंघ चितवनले ’तोरी खायो मौरी’ ले बोलको तीज गीतप्रति आपत्ति जनाएको छ । महासंघले आज (आइतबार) एक विज्ञप्ति जारी गर्दै खेम सेन्चुरी र कमला घिमिरेको आवाजमा रहेको उक्त तीज गीतप्रति आपत्ति जनाएको हो ।

कलाकारले आफ्नो अधिकार उपयोगको नाममा तोरी र मौरीबीचको वैज्ञानिक तथ्यप्रति नै खेलवाड गर्दै भ्रामकता फैलाउन खोजेको महासंघको ठहर छ । गीतले भ्रामकता फैलाउन खोजेको भन्दै महासंघले रचनाकार, गायक, गायिका लगायत सम्पूर्ण टिमप्रति खेद प्रकट गरेको छ ।
गीतमा मौरीले तोरी खादा लट्ठीले हान्ने भन्ने शब्द प्रति महासंघले आपत्ति जनाएको हो । तोरीमा मौरी चरनले ३० प्रतिशतसम्म उत्पादन बढेको तथ्य जानकारी गराउदै महासंघले उक्त गीत बनाउने युनिटलाई नै कारबाहीको माग गरेको छ ।
महासंघका अध्यक्ष शिवप्रसाद शर्माले उक्त गीतले किसानलाई आक्रोसित बनाएको बताउनुभयो । उहाँले त्यस्ता गीत प्रसारण नगर्न तथा गीत सम्बन्धि समाचार प्रकाशन प्रसारण नगर्न पनि संचारमाध्यमहरुलाई आग्रह गर्नुभयो । यस्तै उक्त गीत तत्काल युट्युबबाट हटाउन पनि विज्ञप्ति मार्फत आग्रह गरिएको छ । दुई महिना अघि सार्वजनिक उक्त गीतको शब्द नेत्र अर्यालले लेख्नुभएको हो । गीतमा खेम सेन्चुरीको संगीत भर्नुभएको छ ।