‘जनसङ्ख्या भन्दा जग्गाको टुक्रा धेरै; मान्छे तीन करोड, जग्गाको कित्ताकाट तीन करोड सात लाख’

भरतपुर । कृषि तथा पशुपक्षी विकासमन्त्री चक्रपाणि खनालले देशमा मानिसको जनसङ्ख्या भन्दा धेरै जग्गाको खण्डिकरण भएको बताउनुभएको छ । नेपाल भेटेरिनरी एशोसिएशनको वार्षिक साधारणसभालाई आज भरतपुरमा सम्बोधन गर्दै मन्त्री खनालले तीन करोड जनसङ्ख्या रहेको देशमा तीन करोड सात लाख जग्गाको कित्ताकाट भएको बताउनुभयो ।

देशमा जमीनको खण्डिकरण बढ्दै गइरहेको भन्दै उहाँले कृषियोग्य जमीन मासेर घरको जङ्गलमा परिणत हुनु विडम्बना भएको बताउनुभयो । ‘९० लाख मानिस सुकुम्वासी भनिएर अव्यवस्थित बसोवास गरिरहेका छन्’, उहाँले भन्नुभयो’ “यसलाई व्यवस्थित गरिएन भने झन् भयावह स्थिति आउने देखिन्छ ।”

मन्त्री खनालले कृषिमा निराशा मात्र नभइ आशाका क्षेत्र पनि धेरै रहेको बताउनुभयो । ‘पोल्ट्री क्षेत्र जस्तै अन्य कुरामा पनि आत्मनिर्भर हुन सकिन्छ,त्यसका लागि धेरै मेहनतको आवश्यकता छ’, उहाँले भन्नुभयो ।

विभिन्न क्षेत्रको तालमेल हुन नसक्दा सोचेअनुसार कृषि उत्पादन हुननसकेको उहाँको भनाइ छ । कृषिमा आधुनिकिकरण आवश्यक रहेको भन्दै मन्त्री खनालले प्रधानमन्त्री कृषि आधुनिकिकरण परियोजना र कृषिको अनुदानका विषयमा पुनःमूल्याङ्कन हुनुपर्ने धारणा राख्नुभयो ।

उहाँले सरकारले कृषिमा युवा कार्यक्रम सञ्चालनको तयारी गरेको जानकारी दिनुभयो । तराईमा एकसय बिघाहा र पहाडमा १०० रोपनी एकीकृत गरेर कृषिखेती गर्नेलाई सरकारले सिँचाई, मल, बीउ र उपकरण उपलब्ध गराउने योजना अघि बढाएको उहाँले बताउनुभयो ।