चितवन मेडिकल कलेज : एक वर्षमा चार लाख बढी बिरामीको उपचार, १५७ जनाको ज्यान गयो

चितवन । चितवन मेडिकल कलेज (सिएमसि) मा एक वर्षको अवधिमा चार लाखभन्दा बढी बिरामीको उपचार भएको छ । सो अवधिमा १५७ जनाको उपचारका क्रममा ज्यान गएको हो ।

अस्पतालले आईतबार भरतपुरमा एक कार्यक्रमको आयोजना गरी गत आर्थिक वर्ष २०७५÷०७६ मा बहिरंग सेवा (ओपिडि) मा चार लाख ४४ जना बिरामीलाई सेवा दिईएको जनाएको छ । अस्पतालका निर्देशक डा. दयाराम लम्सालले सो अवधिमा ३२ हजार ५ सय ७६ जनाको आकस्मिक कक्षमा उपचार भएको जानकारी दिनभयो ।

यसैगरी सोही अवधिमा ४२ हजार ७ सय ६ जना बिरामी भर्ना भएर सेवा लिएका छन् । अस्पतालको तथ्यांक अनुसार सो अवधिमा २ हजार ९ सय ९३ जनाले निःशुल्क प्रसुती सेवा, ७ हजार ८ सय ३० जनाले शल्यक्रिया सेवा, २ हजार ५ सय २८ जनाले मुख्य (मेजर) शल्यक्रिया सेवा लिएका छन् ।

गत आर्थिक वर्षमा ११ हजार ११ जनाको सिटीस्क्यान, २ हजार ९ सय ७९ जनाको एमआरआई, ५१ हजार ८ सय ६९ जनाको युएसजि (भिडियो एक्सरे) गरिएको छ ।

यस अवधिमा ७४ हजार ४ सय ६३ जनाले बीमा मार्फत् सेवा लिएका छन् । भर्ना हुने बिरामी मध्ये ५ हजार ६ सय ८४ जनाले बीमा सेवा उपयोग गरेको अस्पताल म्यानेजर पारस अधिकारीले जानकारी दिनुभयो ।

अस्पताले गत आर्थिक वर्षमा सात जिल्लाका १२ ठाउँमा स्वास्थ्य शिविर सञ्चालन गरेको जनाएको छ । शिविरमा ६ हजार ५ सय ५१ जनालाई सेवा दिईएको छ ।

कलेजो प्रत्यारोपण सेवा शुरु

यसैबीच अस्पतालले विश्व हेपाटाईटिस डे (जुलाई २८) को अवसरमा आईतबारबाट कलेजो प्रत्यारोपण सेवा शुरु गरेको छ । अस्पतालका निर्देशक डा. लम्सालका अनुसार कलेजो रोगको बहिरंग (ओपिडि) सेवा शुरु गरिएको हो ।

चितवनमा नै पहिलो पटक हेपाटाईटिस तथा कलेजो प्रत्यारोपण विशेषज्ञ डा. सागर पौडेलबाट दैनिक रुपमा यो सेवा उपलब्ध हुँदै आएको अस्पतालले जनाएको छ । अस्पतालले कलेजो प्रत्यारोपणको स्वीकृती समेत पाईसकेको छ । कलेजो प्रत्यारोपणको दक्ष जनशक्ति तयार भईसकेको जानकारी दिंदै डा. लम्सालले अस्पताललाई देशकै कलेजो प्रत्यारोपणको हब बनाउने लक्ष्य रहेको बताउनुभयो ।