दूरदर्शी सोचका साथ सरकार अघि बढ्नु पर्छ : पाण्डे

चितवन । नेपाल कम्युनिष्ट पार्टी (नेकपा)का स्थायी कमिटी सदस्य सुरेन्द्रप्रसाद पाण्डेले सरकारले दूरदर्शी सोचका साथ योजना ल्याउनुपर्ने बताउनुभएको छ । कम्युनिष्ट पार्टीका संस्थापक नेता स्व पुष्पलालको ४१ औँ स्मृति दिवसका अवसरमा आज आयोजित कार्यक्रमलाई सम्बोधन गर्दै उहाँले आउँदा दिनमा कस्तो समाज निर्माण गर्ने र विश्वको परिवर्तनलाई कसरी सामना गर्ने भन्ने सरकारले समयमानै सोच्नुपर्ने बताउनुभयो ।

विश्वमा कम्युुनिष्ट पार्टीहरू क्रान्ति गर्न सक्ने तर सरकार सञ्चालन गर्न असफल भएको अवस्थाबाट नेपालले पाठ सिक्नु पर्ने उहाँको भनाइ थियो । विश्व राजनीतिको इतिहासलाई हेरेर वर्तमान सरकारले कार्यशैलीमा परिवर्तन गर्नुपर्नेमा जोड दिँदै उहाँले क्रान्ति गर्न कम्युनिष्ट अगाडि भए पनि सरकार सञ्चालनमा विश्वमा असफल रहेको बताउनुभयो । कार्यशैलीमा परिवर्तन गर्न नसके समस्या पर्ने भन्दै नेता पाण्डेले अबको समाज कस्तो बनाउने भन्ने विषयमा पार्टी भित्र छलफल हुनुपर्ने बताउनुभयो ।

कार्यक्रममा नेकपाका केन्द्रीय सदस्य तथा जिल्ला इन्चार्ज कृष्णप्रसाद खनालले पुष्पलालका विषयमा कार्यपत्र प्रस्तुत गर्नुभएको थियो । कार्यपत्रमाथि बुद्धिजीवी रमाकान्त सापकोटा र डा भीमराज अधिकारीले टिप्पणी गर्नुभएको थियो । कार्यक्रम पुष्पलाल स्मृति प्रतिष्ठान चितवनका उपाध्यक्ष यमुना न्यौपानेको अध्यक्षतामा भएको थियो ।