गृहिणीहरुलाई डल तथा कुशन बनाउने तालिम

चितवन । गृहिणीहरुलाई व्यावसायिक र आत्मनिर्भर बनाउने उद्धेश्यले भरतपुरमा डल तथा कुसन बनाउने एक हप्ते तालिम सञ्चालन गरिएको छ । मिसेस चितवन सिजन २ की थर्ड रनर अप प्रतिक्षा पन्तको व्यक्तिगत आयोजनामा गत आइतबारदेखि तालिम सञ्चालन गरिएको हो ।

तालिममा ३४ जना सहभागी छन् । तालिम उद्घाटनमा भरतपुर महानगरपालिकाका उप प्रमुख पार्वती शाहले गृहिणी दिदी बहिनीहरुलाई स्वरोजगार बनाउने उद्धेश्यले आयोजना गरिएको तालिम अत्यन्तै प्रभावकारी हुने विश्वास व्यक्त गर्नुभयो । तालिम उद्घाटनमा प्रमुख अतिथि रहनुभएकी उप प्रमुख शाहले यस किसिमका कार्यक्रमले सकारात्मक सोचको अभिवृद्धि हुनुका साथै स्वावलम्वन र आत्मनिर्भर बनाउन सघाउ पुग्ने बताउनु भयो ।

भरतपुर–१२ स्थित ग्रीनल्याण्ड पब्लिक स्कुलमा सञ्चालित तालिम उद्घाटनमा ग्रीनल्याण्ड पब्लिक स्कुलका प्रिन्सिपल इन्दिरा कार्की, मिसेस चितवन सिजन २ की विजेता जमुना श्रेष्ठ, दुर्गा घिमिर र मीना झाले तालिमले महिलाहरुमा सकारात्मक प्रभाव पार्ने बताउनु भयो ।