गुल्मीमा घरमा पहिरो खस्दा सुतिरहेका ६ जनाको ज्यान गयो

गुल्मी । गुल्मीमा गएरातिदेखि परेको अविरल वर्षासँगै खसेको पहिरोमा पुरिएर घरमा सुतिरहेका ६ जनाको ज्यान गएको छ । पहिरोमा परि दुई जना घाइते भएका छन् । जिल्लाको सत्यवती गाउँपालिका वडा नम्बर ३ र ४ का घर पहिरोले पुरिँदा ६ जनाको ज्यान गएको हो ।

गुल्मीका प्रमुख जिल्ला अधिकारी यदुनाथ पौडेलका अनुसार वडा नम्वर ३को ठूलोलुम्पेक कसिन डाँडामा पहिरोले घर पुरिँदा ३२ वर्षीया तीलकुमारी त्रामु र ९ वर्षीय दर्शन त्रामुको मृत्यु भएको हो । त्यसैगरी वडा नम्बर ४ को लिम्घामा पहिरोले घर पुरिदा ६५ वर्षीया छल्लली बिक, २८ वर्षीया पम्फा बिक, १२ वर्षीया अञ्जली बिक र १० वर्षीय हेमन्त बिकको मृत्यु भएको प्रमुख जिल्ला अधिकारी पौडेलले जानकारी दिनुभएको छ ।

प्रमुख जिल्ला अधिकारी पौडेलका अनुसार पहिरोमा परी वडा नम्वर ४ कि १० वर्षीया करिश्मा त्रामु र १३ वर्षीय धनी त्रामु घाइते भएका छन् । उद्धारका लागि सेना, प्रहरीको टोली घटनास्थलतर्फ पठाइएको पौडेलले बताउनुभएको छ ।