मतपत्र च्यात्नेलाई एक/एक लाख रुपैयाँ जरीवाना, फैसलाबाट देवी ज्ञवाली पनि खुसी

चितवन । भरतपुर महानगरपालिकाको निर्वाचनमा दुई वर्षअघि मतपत्र च्यात्ने तत्कालीन एनेकपा माओवादी (हाल नेकपा)का दुई कार्यकर्तालाई चितवन जिल्ला अदालतले जनही एकलाख रुपैयाँ जरीवानाको सजाय तोकेको छ । निर्वाचन कसुर सम्बन्धी मुद्दामा चितवन जिल्ला अदालतले द्रोणबाबु शिवाकोटी र मधु न्यौपानेलाई आज एक/एक लाख रुपैयाँ जरीवाना तोकेको हो । अदालतले गत जेठ ३० गते नै दोषी ठहर गरेका उनीहरुलाई न्यायाधीश मुरारीबाबु श्रेष्ठको इजलासले उक्त सजाय तोकेको हो ।

भरतपुर महानगरपालिकाको निर्वाचनको मतगणना अन्तिम हुँदैगर्दा मेयर पदका उम्मेदवार देवी ज्ञवालीको पल्ला भारी देखेपछि सोही पदका प्रतिष्पर्धी रेनु दाहालको मतगणना प्रतिनिधि बसेका शिवाकोटी र न्यौपानेले मतपत्र च्यातेका थिए । २०७४ जेठ १४ गते राति भरतपुर १९ को मतगणना सकिदै लाग्दा मतपत्र च्यातिएको थियो । त्यसपछि भरतपुर १९ मा पुनः मतदान भएको थियो । पुनः मतदान भएपछि दाहालले मतगणना गर्न बाँकी वडा नम्वर १९ र २० को गणनामा दुई सय तीन मत बढी पाएर विजयी भएकी थिइन् ।

मतपत्र च्यात्नेलाई जरीवानाको फैसलापछि मेयर पदका प्रतिष्पर्धी देवी ज्ञवालीले खुसी व्यक्त गर्नुभएको छ । अदालतको फैसलाबाट अपराध गर्नेहरु दोषी ठहर हुनुले देशमा कानुनी शासन जीवितै रहेको प्रमाणित भएको उहाँको प्रतिक्रिया छ ।