नारायणगढ–मुग्लिन सडकखण्डमा ट्रकको ठक्करबाट एक जनाको ज्यान गयो, अर्का एक गम्भीर घाइते

चितवन । नारायणगढ–मुग्लिन सडकखण्डमा ट्रकको ठक्करबाट एक जना मोटरसाइकल चालकको मृत्यु भएको छ । अर्का एक गम्भीर घाइते भएका छन् ।

गएराति भएको उक्त दुर्घटनामा परि ज्यान गुमाउनेमा मोरङ हरैचाका ३५ वर्षीय राजेन्द्र चौधरी रहेका जिल्ला प्रहरी कार्यालय, चितवनले जानकारी दिएको छ । चौधरीको घटनास्थलमानै मृत्यु भएको थियो । प्रहरीका अनुसार गम्भीर घाइते सिन्धुली बुलन्जुका ३५ वर्षीय मुरारीप्रसाद बरालको पुरानो मेडिकल कलेजमा उपचार भइरहेको छ ।

नारायणगढबाट मुग्लिनतर्फ जाँदै गरेको ना६ख २६५९ नम्बरको ट्रकले नारायणगढतर्फ आइरहेको बा ८० प ८६५७ नम्बरको मोटरसाइकललाई आइतबार राति भरतपुर महानगरपालिका–२९, खहरे पुलमा ठक्कर दिएको थियो । मोटरसाइकललाई ठक्कर दिने ट्रक र चालक प्रहरीको नियन्त्रणमा छन् ।