मदन जयन्तीमा फलफूलका विरुवा रोपिने

भरतपुर, १३ असार । मदन भण्डारी फाउण्डेशन चितवनले ६८ औं मदन जयन्तीको उपलक्ष्यमा शनिबार फलफूलको विरुवा रोप्ने भएको छ । फाउण्डेशन र थाङ्गखोला सामुदायिक वन उपभोक्ता समितिको संयुक्त आयोजनामा कार्यक्रम गर्न लागिएको हो ।

साविक पदमपुरको कालिका नगरपालिका पर्ने सामुदायिक वनमा कागती र एबोगार्डाेको विरुवा रोपिने फाउण्डेशनका अध्यक्ष डा. तिलचन्द्र भट्टराईले जानकारी दिनुभयो ।

गतवर्ष पनि सोही सामुदायिक वनमा फाउण्डेशनले फलफूलका विरुवा रोपेको थियो । उक्त सामुदायिक वनमा व्यवस्थित फलफूलको बगैंचा तयार पार्ने योजना रहेको फाउण्डेशनका बरिष्ठ उपाध्यक्ष शम्भु सुवेदीले बताउनुभयो । फलफूल उत्पादन भएपछि सामुदायिक वनका उपभोक्ताको नै स्वामित्व हुने गरी बगैंचा तयार गर्न लागिएको उहाँले जानकारी दिनुभयो ।

“समृद्ध नेपाल, सुखी नेपाली” भन्ने नेपाल सरकारको नारालाई सार्थक पार्न सामुदायिक वनमा उत्पादनशील फलफूलका विरुवा रोप्ने कार्यलाई महत्व दिईएको फाउण्डेशनले जनाएको छ ।

मदनकुमार भण्डारीको जन्म २००९ साल आषाढ १४ गते ताप्लेजुङ जिल्लाको ढुङ्गेसाँघुमा भएको हो । पिता देवीप्रसाद भण्डारी र माता चन्द्र कुमारीको माहिँला छोराको रूपमा भण्डारीको जन्म भयो ।

नेकपा (एमाले) का तत्कालिन महासचिव मदनकुमार भण्डारीको बि.सं. २०५० साल जेठ ३ गते चितवनको दासढुंगामा रहस्यमय जीपदुर्घटनामा परी निधन भएको थियो ।