विषालु च्याउ खाँदा एक जनाको मृत्यु, बेहोस तीन जनालाई हेलिकोप्टरबाट भरतपुर अस्पताल ल्याइयो

हेटौंडा । मकवानपुरको राक्सिराङ गाउँपालिका वडा नम्बर ७, दराङमा विषालु च्याउ खाँदा एक जनाको मृत्यु भएको छ भने अरु तीन जना बेहोस भएका छन् । विषालु च्याउ पकाएर खाँदा स्थानीय १३ वर्षिय गुन्जमाया चेपाङको मृत्यु भएको जिल्ला प्रहरी कार्यालय मकवानपुरका प्रहरी उपरीक्षक मुकेश कुमार सिंहले जानकारी दिनुभएको छ ।

विषालु च्याउ खाएका गुन्जमायाका बुवा, भाई र दाई बेहोस अवस्थामा रहेका छन् । उनीहरुको उपचारका लागि दिगो विकासका लागि एकता नेपाल संस्थाले हेलिकोप्टर मार्फत भरतपुर अस्पतालमा पुर्याएको छ । बेहोस भएका तीनै जनाको अस्पतालमा उपचार भईरहेको छ । मकवानपुरको विकट ठाउँ भएकाले गाडीमा ल्याउनका लागि घण्टौँ लाग्ने र बेहोस भएकाहरुको ज्यान खतरामा पर्ने भएपछि हेलीकोप्टर मार्फत उद्धार गरिएको हो।