चुकेको निधनमा काँग्रेसले भन्यो : कर्मठ समाजसेवी गुमायौँ

चितवन । नेपाली काँग्रेस चितवनले पार्टीका नेता, पूर्व महासमिति सदस्य, भरतपुर महानगरपालिकाका संस्थापक नगर प्रमुख तथा राष्ट्रिय पञ्चायतका जनपक्षिय साँसद मुक्तिलाल चुकेको निधनबाट परिवारले मात्र नभई सिंगो नेपाली काँग्रेस र समाजले कर्मठ समाजसेवी गुमाएको बताएको छ । काँग्रेस जिल्ला सभापति जीतनारायण श्रेष्ठले आज एक शोक सन्देश जारी गर्दै स्वर्गीय चुकेले पार्टी तथा समाजसेवाको क्षेत्रमा पुर्याउनुभएको योगदानको उच्च मूल्याङ्कन गर्दै उहाँको आत्माको चीर शान्तिको कामना गर्दै शोक सन्तप्त परिवारजनमा समवेदना व्यक्त गर्नुभएको छ ।

शोक सन्देशमा शनिबार विहान ८ देखि ९ बजेसम्म श्रद्धासम्मान व्यक्त गर्न स्वर्गीय चुकेको पार्थिव शरीर काँग्रेस पार्टी कार्यालय, कमलनगर नारायणगढमा राखिने जनाउँदै शनिबार पार्टीको तर्फबाट आयोजना गरिएका शोकसभा बाहेक अन्य कुनै पनि कार्यक्रम नगर्न नगराउन पार्टी एवम् भातृ तथा शुभेच्छुक संस्थाहरुलाई अपील पनि गरिएको छ ।

शोक सन्देशमा स्वर्गीय चुकेले युवाकालीन उमेरदेखि कर्मक्षेत्र बनाई चितवन जिल्लाको शिक्षा, स्वास्थ्य, यातायात, धार्मिक स्थल एवम् पर्यटनको विकासका साथै प्रजातन्त्र स्थापनाका निम्ति पुर्याउनुभएको योगदानको स्मरण गरिएको छ ।