अबको रणनीति बनाउन नेपाल पक्ष आन्तरिक छफलमा बैठक बस्दै

काठमाडौं,२८ बैशाख । सांसद पदबाट राजीनामा नदिई संसदमा अनुपस्थित भएको नेकपा एमालेको माधव नेपाल पक्ष अबको रणनीति बनाउन आन्तरिक छफलमा जुटेको छ । नेपाल पक्षका स्थायी कमिटी सदस्यहरुबीच आज अबको रणनीति के हुने भन्ने बारे छलफल हुन लागेको हो ।

भौतिक रूपमा जम्मा भएर बैठक बस्न सम्भव नभए पनि भर्चुअल बैठक बसेर अबको निकासका सन्दर्भमा छलफल हुने स्थायी कमिटी सदस्य अष्टलक्ष्मी शाक्यले  बताइन् ।

ह्वीप उल्लंघन गरेर अनुपस्थित भए पनि एमालेले माधव नेपालसहित २८ सांसदमाथि तत्काल कारवाही नगर्ने देखिएको छ । वैकल्पिक सरकार गठनको प्रक्रियामा सघाउ पुग्ने भएकाले तत्काल कुनै कारवाही नगरिने बरु नेपाल पक्षका सांसदलाई व्यक्तिगत रूपमा कुराकानी गरेर संस्थापन पक्षमा तान्ने प्रयास भइरहेको स्रोतले जनाएको छ ।

ओलीले संसदमा आफूविरुद्ध बहुमत नपुग्ने सुनिश्चत गरेपछि कारवाही गर्न सक्ने आँकलन नेपाल पक्षको छ । शेरबहादुर देउवा, प्रचण्ड र उपेन्द्र यादवले माधव नेपाललाई भेटेर राजीनामा दिने वा नदिने प्रष्ट धारणा दिन आग्रह गरेका छन् ।

नेपाल पक्षमा राजीनामाको विषयमा सर्वसम्मत हुन नसकेपछि सोमवारको बैठकमा केही नेताबीच भनाभन नै परेको स्रोतले जनाएको छ । आज देउवाले आयोजना गरेको सर्वदलीय बैठकमा माधव नेपाललाई पनि बोलाइएको थियो ।

तर, सबै पक्षमा आन्तरिक छलफलपछि मात्र बैठक बस्ने भएको छ । नेपाल पक्षमाथि चाँडो निर्णय लिन दबाब छ ।