पार्टीभित्रको अनुशासनहीनता अन्त्य हुन्छ : देउवा

महेन्द्रनगर

नेपाली काँग्रेसका सभापति शेरबहादुर देउवाले पार्टी भित्रको अनुशासनहीनता अन्त्य गर्न प्रतिवद्ध रहेको बताएका छन् । उनले पछिल्लो निर्वाचनका क्रममा पार्टी भित्र भएको अन्तरघातलाई आगामी चुनावमा दोहोर्‍याउन नदिने बताए।

महेन्द्रनगरमा पत्रकारहरुसँग कुरा गर्दै सभापति देउवाले पार्टी भित्र गठन भएको केन्द्रीय अनुशासन समितिले अन्तर्घात र गुटउपगुट प्रवृत्तिबिरुद्ध निष्पक्ष अनुसन्धान गरी कारबाही सिफारिस गर्ने विश्वास व्यक्त गरे ।

प्रजातान्त्रिक पार्टीमा गुट हुनु सामान्य रहेपनि कम्युनिष्ट पार्टीमा पनि गुटगत राजनीति देखापरेको कांग्रेस सभापति देउवाको टीप्पणी थियो । सरकारप्रति कटाक्ष गर्दै सभापति देउवाले शान्ति सुरक्षाको प्रत्याभुति गर्न नसकेको आरोप लगाए ।

निर्मला हत्या घटनाको ९ महिना बितिसक्दा पनि अपराधी पक्राउ गर्न नसक्नु सरकारको कमजोरी रहेको सभापति देउवाले बताए । सरकारले प्राज्ञिक क्षेत्रदेखि प्रेससम्म जताततै अनावश्यक हस्तक्षेप गरि लोकतन्त्रको मर्म विपरित काम गरिरहेको आरोप पनि लगाए ।

देउवाले नेक्रवित्रम चन्द समुहलाई प्रतिवन्ध लगाएर सरकारले द्वन्द्व र विवाद चर्काउनु भन्दा वार्ताका माध्यमबाट समस्या समाधान गर्नु पर्ने धारणा राखे ।