भरतपुर नगरपालिकाका संस्थापक मेयर एवम् राष्ट्रिय पञ्चायतका जनपक्षिय साँसद मुक्तिलाल चुकेको निधन

चितवन । भरतपुर नगरपालिकाका संस्थापक मेयर मुक्तिलाल चुकेको आज निधन भएको छ । उहाँको नारायणगढस्थित आफ्नै निवासमा निधन भएको हो । चुके २०३५ सालमा तत्कालीन भरतपुर नगरपञ्चायतको मेयर बन्नुभएको थियो । बहुदलीय प्रजातान्त्रिक व्यवस्थाको पुनस्र्थापनापछि पनि उहाँ भरतपुर नगरपालिकाको मेयर बन्नुभएको थियो । 

प्रजातन्त्रका सेनानी चुके राष्ट्रिय पञ्चायतका जनपक्षिय साँसदसमेत हुनुभएको थियो । उहाँ नेपाली काँग्रेस पार्टीसँग आवद्ध हुनुहुन्थ्यो । समाजसेवामासमेत उहाँको उत्तिकै सक्रियता थियो । उहाँको जन्म वि.सं. १९९२ कार्तिक १ गते गुल्मी जिल्लाको बामेटक्सारमा भएको थियो ।स्वर्गीय चुकेको अन्तिम संस्कार भोलि विहान गर्ने परिवारमा सल्लाह भएको उहाँका आफन्तले बताएका छन् ।

काठमाडौँको अमृत साइन्स कलेज (अस्कल)बाट आईएस्सी उत्तीर्ण गर्नुभएका उहाँले चितवन फर्केपछि राजनीतिमा लाग्नुभएकोले स्नातकमा भर्ना भएपनि पढाई पूरा गर्न पाउनुभएन । वि.सं. २०२१ सालमा माधुरीदेवी श्रेष्ठसँग विवाह गर्नुभएका चुकेका तीन छोरा र एक छोरी हुनुहुन्छ ।

परिवारसँग मुक्तिलाल चुके ।

२०३५ सालमा स्थापित भरतपुर नगरपञ्चायत ०४६को परिवर्तनपछि नगरपालिका बनेको थियो । भरतपुर उपमहानगरपालिका हुँदै हाल महानगरपालिका बनेको छ ।