विश्वकपमा सट्टेबाजी गर्ने चितवनमा पक्राउ

चितवन । विश्वकप क्रिकेट प्रतियोगितामा सट्टेबाजी गरेको आरोपमा प्रहरीले चितवनमा एक जनालाई पक्राउ गरेको छ ।

पक्राउ पर्नेमा नवलपरासी प्रतापपुर घर भई भरतपुर महानगरपालिका वडा नम्वर ३ मा कोठा भाडामा लिई बस्दै आएका ३३ वर्षीय मुकेशकुमार साह रहेका छन् । कोठाबाट तीन लाख ४५ हजार ५६ रुपैयाँसहित गएराति साहलाई नियन्त्रणमा लिइएको जिल्ला प्रहरी कार्यालय, चितवनले जनाएको छ। उनको साथबाट ६ थान मोबाइलसमेत बरामद गरिएको प्रहरीले जनाएको छ ।

नेपाली तथा भारतीय नागरिकसमेतलाई आबद्ध गराई ठूलै रकमको सट्टेबाजी गराउँदै आएका शाह विगतमा पनि राष्ट्रिय र अन्तर्राष्ट्रिय खेलहरुमा सट्टेबाजी गर्ने तथा गराउने कार्यमा संलग्न रहेको प्रहरीको दाबी छ ।

पक्राउ परेका साहलाई मुलुकी अपराधसंहिता २०७४ को परिच्छेद ५ सार्वजनिक हित, स्वास्थ्य, सुरक्षा, सुविधा र नैतिकता विरुद्धको कसुरअन्तर्गत दफा १२५ को उपदफा ४ बमोजिम कारवाही गरिने प्रहरी नायब उपरीक्षक एकनारायण कोइरालाले बताउनुभयो । कसुरमा बरामद बिगो जफत गरी एक वर्ष कैद र दश हजार रुपैयाँसम्मको जरिवाना हुने कानूनी व्यवस्था छ । साह खाद्यान्न व्यापारी रहेका प्रहरीले जनाएको छ ।