सहायक सीडीओलाई कोरोना देखिएपछि पाल्पा प्रशासनको काम प्रभावित

रूपन्देही, १३ वैशाख । सहायक प्रमुख जिल्ला अधिकारी शशीधर घिमिरेलाई कोरोना देखिएपछि जिल्ला प्रशासन कार्यालय पाल्पाको दैनिक काम प्रभावित भएको छ।

आइतबार संक्रमण पुष्टिपछि सहायक सीडीओ घिमिरे होम आइसोलेसनमा छन् । उनीसँग सम्पर्कमा आएका अन्य पाँच कर्मचारी पनि होम आइसोलेसनमा बसेको प्रमुख जिल्ला अधिकारी योगेन्द्रप्रसाद पाण्डेले बताए । कर्मचारी आइसोलेसनमा बस्नु परेकाले कार्यालयको काम प्रभावित भएको हो । अन्य कर्मचारीको मंगलबार कोरोना परीक्षणको तयारी भइरहेको छ ।

यस्तै‚ राष्ट्रिय अनुसन्धान कार्यालय पाल्पाका प्रमुख र एक हवल्दारलाई पनि कोरोना संक्रमण भएको छ।

जिल्ला स्वास्थ्य कार्यालय पाल्पाका सूचना अधिकारी ओमप्रकाश पन्थीका अनुसार पाल्पामा संक्रमितको संख्या २ हजार १६० जना पुगेको छ । तीमध्ये १५२ जना सक्रिय संक्रमित छन् । ३९ जनाको मृत्यु भएको छ ।