त्रिशुलीमा खस्दा एकको मृत्यु, दुई वेपत्ता र आठ जना घाईते

चितवन, १२ वैशाख । भरतपुर महानगरपालिका वडा नम्बर १ ठिमुरामा देवघाट जोड्ने पुलको काम गर्ने क्रममा त्रिशुलिमा खसेका मजदु मध्ये एक जनाको मृत्यु भएको छ भने आठ जना घाइते भएका छन् । सोही क्रममा दुई जना बेपत्ता भएको जिल्ला प्रहरी कार्यालय चितवनले जनाएको छ ।

प्रहरीका अनुसार मृत्यु हुनेमा भारतको बेतिया जिल्ला घर भएका ४३ वर्षिय विजय यादक रहेका छन् । उनको उपचारका क्रममा चितवन मेडीकल कलेजमा मृत्यु भएको प्रहरीले जनाएको छ । घाइते मध्ये दुई जना सामान्य र ६ जना मध्येम रहेका छन् । उनीहरुको पनि चितवन मेडीकल कलेजमा उपचार भईरहेको छ ।

बेपत्ता हुनेमा भारतको विहार घर भएको श्याम वावु पाठक र सुनिल माझि रहेका छन् । उनीहरुको खोजी कार्य भइरहेको प्रहरीले जनाएको छ ।

जिल्ला प्रहरी कार्यालय चितवनका प्रमुख प्रहरी उपरिक्षक ओमप्रसाद अधिकारीका अनुसार आज बिहान ९ वजे तिर पुलमा फलामको काम गर्दै गर्दा फलाम सहित मजदुर खसेका थिए । दुई जना त्रिशुलीमा बेपत्ता भएको र फलामले च्यापिएकाहरुको उद्वार गरिएको उहाँले जानकारी दिनुभयो ।

निर्माणाधिन सो पुलको केही भाग चैत्र २४ गते भाँचिएर नदिमा खसेको थियो । सो स्थानमा १४ जना मजदुरले काम गरिरहेका थिए । भरतपुर महानगरपालिका वडा नम्बर १, ठिमुरा र देवघाट गाउँपालिका वडा नम्बर ५, घिनाटार जोड्ने ८.५ मिटर चौडाइ भएको २२० मिटर लामो पुल निर्माण भइरहेको थियो ।