पत्रकार महासंघ चितवनले पठायो प्रधानमन्त्रीलाई हस्ताक्षर : “नियमनको नाउँमा नियन्त्रणको प्रयास”

चितवन । नेपाल पत्रकार महासंघ चितवन शाखाले मिडिया काउन्सिल विधयेकविरुद्ध संकलन गरिएको हस्ताक्षर शुक्रबार प्रमुख जिल्ला अधिकारी मार्फत् प्रधानमन्त्री केपी शर्मा ओलीलाई पठाएको छ ।

जिल्ला प्रशासन कार्यालय चितवनमा आयोजित कार्यक्रममा महासंघ चितवनका अध्यक्ष राधेश्याम खतिवडाले विधेयकमा नियमनको नाउँमा नियन्त्रण गर्न सक्ने गरी बुँदाहरु समेटिएको बताउनुभयो । मिडियालाई नियमन गर्न कुनै आपत्ति नरहेको बताउँदै उहाँले नियन्त्रण गर्न खोज्नु घातक रहेको बताउनुभयो ।

मिडिया काउन्सिल विधेयकमा काउन्सिल गठन, नियुक्त र सञ्चालन सम्बन्धी बुँदाहरु आपत्तिजनक रहेको बताउँदै उहाँले पर्याप्त छलफल नगरी विधेयक ल्याईएको बताउनुभयो ।

सो अवसरमा प्रमुख जिल्ला अधिकारी जीतेन्द्र बस्नेतले महासंघले बुझाएको हस्ताक्षर छिटो प्रधानमन्त्री कार्यालयमा पठाउन पहल गर्ने बताउनुभयो ।

संकलित हस्ताक्षर अध्यक्ष खतिवडाले प्रमुख जिल्ला अधिकारी बस्नेतलाई बुझाउनु भएको थियो । सो अवसरमा जिल्लाका पत्रकारहरुको बाक्लो उपस्थिति रहेको थियो ।

सरकारले संसदमा दर्ता गराएको मिडिया काउन्सिल विधेयक फिर्ता लिन माग राख्दै नेपाल पत्रकार महासंघले घोषणा गरेको तेस्रो चरणको आन्दोलन अन्तर्गत मंगलबारदेखि देशव्यापी प्रेस स्वतन्त्रताको पक्षमा हस्ताक्षर संकलन अभियान सुरु गरिएको थियो । विधेयकमा भएका प्रेस स्वतन्त्रताविरुद्धका प्रावधानहरु अविलम्ब फिर्ता लिन माग राख्दै महासंघले दुई चरणमा आन्दोलन सम्पन्न गरिसकेको छ ।