प्रेसलाई अङ्कुश लगाउने काम हुँदैन : कार्यवाहक प्रधानमन्त्री पोखरेल

‘संवैधानिक अङ्गले संविधानसम्मत गरेको कार्यमा कार्यपालिकाले हस्तक्षेप गर्न मिल्दैन’

विराटनगर । कार्यवाहक प्रधानमन्त्रीसमेत रहनुभएका उपप्रधान तथा रक्षामन्त्री ईश्वर पोखरेलले वर्तमान सरकारले प्रेसलाई नियन्त्रण गर्ने कल्पना पनि गर्न नसकिने बताउनुभएको छ ।

विराटनगर विमानस्थलमा आज सञ्चारकर्मीहरुसँग संक्षिप्त कुरा गर्दै उहाँले प्रेस स्वतन्त्रता र लोकतन्त्रका लागि लडेको शक्ति प्रेसलाई वर्तमान सरकारले अङ्कुस लगाउने कुनै पनि कार्य नगर्नेमा ढुक्क हुन आग्रह गर्नुभयो । कार्यवाहक प्रधानमन्त्री पोखरेलले सरकारले ल्याउन लागेको मिडिया काउन्सिल विधेयकलाई थप व्यवस्थित बनाइने बताउनुभयो ।

उहाँले विधेयकले प्रेसलाई मर्यादित बनाइ अनुचित र गैरजिम्मेवार कार्यलाई भने नियन्त्रण गर्ने बताउनुभयो । उहाँले विधेयकले नेपाली प्रेस जगतलाई व्यवस्थित र मर्यादित बनाउने उल्लेख गर्दै विधेयकलाई व्यवस्थित बनाउन आवश्यक सल्लाह, सुझावलाई सरकारले आत्मसात गरेर अघि बढ्ने प्रष्ट पार्नुभयो ।

उहाँले संवैधानिक अङ्गले संविधानसम्मत गरेको कार्यमा कार्यपालिकाले हस्तक्षेप गर्न नमिल्ने बताउनुभयो । लोकसेवा आयोगले कर्मचारी भर्ना प्रक्रिया समावेशी सिद्धान्तअनुसार अघि बढाएको भनेर प्रष्ट पारिसकेको अवस्थामा उहाँले अन्य कुरामा सत्यता नभएको विचार व्यक्त गर्नुभयो । उहाँले प्रदेशस्तरमा लोकसेवा आयोग नबनेकोे अवस्थामा स्थानीय निकायलगायत प्रदेशस्तरमा कर्मचारी पदपूर्तिका लागि सङ्घीय लोकसेवा आयोगले गरेको कर्मचारीको मागको विज्ञापनलाई अनुचित भन्न नमिल्ने बताउनुभयो ।