विषाक्त जङ्गली च्याउ खाँदा एक बालिकाको मृत्यु, नौ जना बिरामी

चितवन । पाल्पाको निस्दी गाउँपालिका–३ झिरुवासको सार्कीडाँडामा विषाक्त जङ्गली च्याउ खाँदा गम्भीर विरामी भएकी एक बालिकाको उपचारको क्रममा मृत्यु भएको छ । अर्की एक बालिकाको गम्भीर अवस्थामा उपचार भइरहेको छ ।

जङ्गली च्याउ खाएर गम्भीर विरामी भई चितवनस्थित पुरानो मेडिकल कलेजमा ल्याइएका दुई मध्ये आठ वर्षीया निर्मलासिंह ठकुरीको गएराति मृत्यु भएको जिल्ला प्रहरी कार्यालय, चितवनले जनाएको छ । अर्की चार वर्षीया विष्णुसिंह ठकुरीको गम्भीर अवस्थामा उपचार भइरहेको प्रहरीले जनाएको छ । उनीहरु दिदीबहिनी हुन् ।

विषाक्त जङ्गली च्याउ तरकारीका रुपमा खाँदा उनीहरु विरामी परेका थिए । बिरामी हुने अन्यमा ४५ वर्षीय पुरन खाम्चा, उनकी श्रीमती ४० वर्षीया चन्द्री खाम्चा, १५ वर्षीया छोरी निर्मला खाम्चा, ८१ वर्षीय प्रेमबहादुरसिंह ठकुरी, ३० वर्षीया दानकुमारी सिंह, सात वर्षीय सुमन सिंह, धनकुमारी सिंह र निरुता सिंह ठकुरी रहेका छन् । उनीहरु चार परिवारका सदस्य हुन् । उनीहरुको नवलपुरस्थित मध्यविन्दु अस्पतालमा उपचार भइरहेको छ ।

उनीहरुले शुक्रबार बेलुकी च्याउ खाएपछि शनिबार अपराह्नबाट बिरामी पर्न थालेका थिए । वान्ता हुने, बेहोस हुने, अत्तालिने गरेपछि उनीहरुलाई उपचारका लागि अस्पताल लगिएको थियो ।