भरतपुर आँखा अस्पताललाई लायन्स क्लब इन्टरनेशनल फाउण्डेशनले दियो उपकरण

चितवन । लायन्स क्लब इन्टरनेशनल फाउण्डेशनले यहाँको  भरतपुर आँखा अस्पताललाई दुई महत्वपूर्ण उपकरण हस्तान्तरण गरेको छ । नेपाल नेत्रज्योति सङ्घले शुक्रबार भरतपुरमा आयोजना गरेको कार्यक्रममा ती उपकरण हस्तान्तरण गरिएको हो ।

फाउण्डेशनका तर्फबाट यस परियोजनाका प्राविधिक सल्लाहकार चिकित्सा विज्ञान राष्ट्रिय प्रतिष्ठान (नाम्स)का उपकुलपति प्राडा देवनारायण शाह र परियोजनाका अध्यक्ष प्रा जयहरिराज पाण्डेले सङ्घका सभापति एवं अस्पतालका अध्यक्ष कृष्णराज धरेललाई ती उपकरण हस्तान्तरण गर्नुभएको हो ।

सो अवसरमा आँखाको रेटीनाको शल्यक्रिया गर्दा प्रयोग हुने अप्रेटिङ माइक्रोस्कोप र भिट्रेक टोमी हस्तान्तरण गरिएको हो । कार्यक्रममा दिइएको जानकारीअनुसार माइक्रोस्कोप रु ८२ लाख र भिटे«क टोमी रु ६९ लाखमा खरिद गरिएको हो । दुवै उपकरणका लागि लायन्स क्लबले ७५ प्रतिशत सहयोग गरेको छ भने बाँकी खर्च आँखा अस्पतालले जुटाएको हो ।

अस्पतालका पूर्वअध्यक्ष एवम् नेपाल नेत्रज्योति सङ्घका केन्द्रीय कोषाध्यक्ष चिजकुमार मास्केका अनुसार लायन्स क्लब इन्टरनेशनलको सहयोगमा आँखाको क्षमता परीक्षण गर्ने अप्टिकल बायोमेट्री र आँखाको सिटिस्क्यान गर्ने ओसीटी उपकरण खरिद गरिँदैछ । ती दुई उपकरण खरिद गर्न रु २ करोड २५ लाख लाग्नेछ । जसका लागि लायन्सले रु ८० लाख हाराहारी बेहोर्ने जनाएको छ । अन्य रकम जुटाएर ती उपकरण भित्र्याइने मास्केले जानकारी दिनुभयो । अस्पतालले हरेक वर्ष दुई लाखभन्दा बढी बिरामीको उपचार गर्ने गरेको छ । रासस