नेकपा चितवनको जिम्मेवारी हेरफेर : अध्यक्षमा पार्वती रावल, सचिवमा प्रकाश खनाल ‘शैलेस’

चितवन, ५ फागुन । नेपाल कम्युनिस्ट पार्टी (नेकपा) चितवनको अध्यक्षमा पार्वती रावल चयन हुनु भएको छ । नेकपा चितवनको आज भरतपुरमा बसेको बैठकले यस अगाडीका अध्यक्ष र सचिबलाई जिम्मेवारी मुक्त गरी रावललाई अध्यक्ष र प्रकाश खनाल ‘शैलेस’ लाई सचिवमा चयन गरेको हो ।

नेकपा प्रदेश कमिटी अध्यक्ष आनन्द पोख्रेल तथा प्रदेश सहइन्चार्ज काशीनाथ अधिकारी सहितको उपस्थितिमा भएको सो बैठकले जिम्मेवारी प्रदान गरेको हो । नेकपाका केन्द्रीय सदस्य हरि सापकोटालाई पार्टीको चितवन जिल्ला इन्चार्जको जिम्मेवारी दिन प्रदेस कमिटीको बैठकले सिफारिस गरेको जानकारी बैठकमा दिईएको थियो ।

रावल तत्कालीन नेकपा (एमाले) को जिल्ला सचिव एवम् राष्ट्रिय सभा सदस्य हुनुहुन्छ । उहाँ राष्ट्रिय सभाको राष्ट्रिय सरोकार तथा समन्वय समितिको सभापति समेत हुनुहुन्छ । सचिव खनाल रामबहादुर थापा बादल समूहका हुनुहुन्छ ।

बैठकले १० औं जिल्ला अधिवेशन गराउन ५०१ सदस्यीय आयोजक कमिटी गठन गरेको छ । कमिटीका सबै सदस्यहरूको सपथ ग्रहण फागुन १० गते राखिएको छ । बैठकले नीति, सिद्धान्त, आर्दश र पार्टी एकता विरोधी गतिविधिमा संलग्न भएको आरोप लगाउँदै नेकपाका जिल्ला अध्यक्ष यमबहादुर परियार र सचिव कृष्णभक्त पोखरेललाई जिम्मेवारीबाट हटाएको छ ।