नक्कली म्यासेज बनाई दुष्प्रचार : सूर्य थापा

काठमाण्डौं, २२ माघ । प्रधानमन्त्रीका प्रेस सल्लाहकार सूर्य थापाले आफ्नो फेसबुक आइडीलाई स्क्रिन सट गरी नक्कली म्यासेज बनाई दुष्प्रचार गरेको बताउनु भएको छ । उहाँले माधवकुमार नेपालका कान्छा भाइ सरोज उपाध्यायसहितकाले यस्तो घिनलाग्दो अपराध कर्म गरेको जनाउनु भएको छ ।

थापाले यस्तो कार्यको निन्दा गर्दै भन्नुभएको छ “माझण्ड गुटका अपराधिक मानसिकता राख्ने व्यक्तिहरूको साइबर अपराधमा संलग्नतामा भोलि माघ २३ गतेको हाम्रो पार्टीको बहुचर्चित जनप्रदर्शनबारे भ्रम फिजाउन सक्रिय रहेको देखिएको छ ।” उहाँले प्रधानमन्त्री केपी शर्मा ओली र पार्टीका अन्य नेता गणहरूका विचार सुन्न उपत्यका र वागमती प्रदेशका जनसमुदायहरूलाई केन्द्रीत गरी आयोजना गरिएको माघ २३ गतेको कार्यक्रम निर्धारित समयमै हुने जनाउनु भएको छ । उहाँले अगाडि भन्नुभएको छ “यथार्थप्रति कसैले अन्यथा गर्न खोज्नु हत्केलाले सूर्य छोप्न खोज्नुजस्तै हो ।”

थापाले भन्नुभयो “भोलि माघ २३ गतेको कार्यक्रम विरूद्दको षडयन्त्र अन्तर्गत नै उक्त गुटले आज गरेको तथाकथित आमहडतालको सर्वत्र आलोचना, निन्दा र भ्रत्सर्ना भएको पनि अवगत नै छ ।” उहाँले यसरी नक्कली कार्यबाट दुष्टतापूर्वक भ्रमको खेती गर्नेहरूप्रति सावधान रहन र अन्योलमा नपर्नसम्बद्ध सबैमा अनुरोध पनि गर्नुभएको छ ।