कृषि विश्वविद्यालयको रजिष्टारमा प्रा.डा.थपलिया र सेवा आयोगको अध्यक्षमा प्रा.डा. मिश्र नियुक्त

चितवन, २२ पुस । कृषि तथा वनविज्ञान विश्वविद्यालय रामपुर चितवनको रजिष्टारमा प्रा डा शारदा थपलिया नियुक्त हुनुभएको छ । विश्वविद्यालयका उपकुलपति प्रा डा पुण्यप्रसाद रेग्मीको सिफारिसमा कुलपति एवम् प्रधानमन्त्री केपी शर्मा ओलीले प्रा डा थपलियालाई रजिष्टारमा नियुक्त गर्नुभएको हो ।

थपलियाले यसअघि विश्वविद्यालयको निमित्त उपकुलपति र रजिष्टारको रुपमा काम गरिसक्नु भएको छ । गएको माघ १२ गते प्रा डा मनराज कोलाक्षपतिको पदावधि सकिएपछि विश्वविद्यालयको रजिष्टार पद रिक्त थियो । रजिष्टार नहुँदा विश्वविद्यालयका दैनिक कामकाज प्रभावित बन्दै आएका थिए ।

यस्तै विश्वविद्यालयको सेवा आयोगको अध्यक्ष प्रा डा कल्याणी मिश्र त्रिपाठी नियुक्त नियुक्त हुनुभएको छ । विश्वविद्यालयका सहकुलपति एवम् शिक्षा मन्त्री कृष्णगोपाल श्रेष्ठको सिफारिसमा कुलपति केपी शर्मा ओलीले उहाँलाई अध्यक्ष नियुक्त गरिएको हो ।

तीन सदस्यीय आयोगमा कुलपतिबाट नियुक्त अध्यक्षसहित दुई जना र एक जना लोकसेवा आयोगका पदाधिकारी सदस्य रहने व्यवस्था छ । गएको साउन ५ गतेदेखि विश्वविद्यालय सेवा आयोगको अध्यक्ष पद खाली रहेको थियो ।