युनियनको वनभोजमा पेशागत सुरक्षाको चिन्ता

चितवन, १८ पुस । नेपाल प्रेस युनियन चितवनले आज भरतपुरमा आयोजना गरेको वनभोज तथा अन्तक्र्रिया कार्यक्रममा पत्रकारहरुले पेशागत सुरक्षामाथि चिन्ता प्रकट गरेका छन् । कार्यक्रममा बोल्दै चितवनका पत्रकारले कोरोनाका कारण विस्थापित बनेका पत्रकारहरुलाई पुनर्बहाली गर्नुपर्नेमा जोड दिए ।

कार्यक्रममा नेपाल प्रेस युनियनका केन्द्रीय बरिष्ठ उपाध्यक्ष दीपक आचार्यले सञ्चार।कर्मीलार्इ उचित पारिश्रमिक दिलाउनुपर्ने बताउनुभयो । उहाँले पत्रकारले नागरिकको अधिकारबारे बोल्ने भएकाले पत्रकारको पेशागत सुरक्षा गरिनुपर्ने बताउनुभयो ।

शाखाका निवर्तमान अध्यक्ष तथा पत्रकार महासंघ चितवनका उपाध्यक्ष नारायणप्रसाद अधिकारीले श्रमजीवी पत्रकारको पेशागत हकहितका लागि सक्रिय भएर लाग्ने बताउनुभयो । उहाँले रोजगारविहिन बनेका दक्ष पत्रकारलाई उचित रोजगारीको वातावरण बनाउने दावी गर्नुभयो ।

शाखा अध्यक्ष अनिल ढकालले पत्रकारलार्इ सक्षम र दक्ष बनाउने कार्ययोजना बनाइने बताउनुभयो । उहाँले पत्रकारलाई कमजोर बनाउने नदिइने बताउनुभयो । शाखाका सल्लाहकार पूर्ण शर्माले पत्रकारको संख्या कटौती हुन पुग्नु दुखद् भएको बताउनुभयो । उहाँले मिडिया हाउस सन्चालकसँग पहल गरेर पत्रकारको पेशागत सुरक्षा गरिनुपर्ने बताउनुभयो ।

पत्रकार विप्लव काफ्लेले कोभिडको बहानामा विस्थापित बनाइएका पत्रकारको पुनर्बहाली गर्न शसक्त भूमिकाको खाँचो रहेको बताउनुभयो । पत्रकार रमेश पौडेलले सन्चारगृहले विना कारण पत्रकार हटाउने परिस्थिति बन्द गर्नुपर्ने बताउनुभयो ।

कार्यक्रममा पत्रकारहरु रमेशचन्द्र बस्ताकोटी, गोविन्द अर्याल, केशव भट्टराई, अर्जुन अधिकारी, अनिता अर्याल, अपील घिमिरे, प्रकाशबाबु खनाल, सन्दीपकुमार श्रेष्ठ, कमलमान श्रेष्ठ अनिशा थापा, नेत्र गुरुङ, शिव शर्मा लगायतले पत्रकार हकहितकोबारेमा बोल्नुभएको थियो ।