२६२ आधारभूत अस्पताल निर्माण गर्ने निर्णयमा हस्ताक्षर गर्दै मन्त्री त्रिपाठीद्वारा पदभार ग्रहण

काठमाडौं, १२ पुस । स्वास्थ्य तथा जनसंख्या मन्त्री हृदयेश त्रिपाठीले आगामी वर्ष २६२ वटा आधारभूत अस्पताल निर्माण गर्ने निर्णयमा हस्ताक्षर गर्दै पदभार ग्रहण गर्नुभएको छ । आइतबार स्वास्थ्य मन्त्रालयमा पदभार ग्रहण गर्दै मन्त्री त्रिपाठीले आगामी वर्ष २६२ वटा स्थानीय तहमा ५,१० र १५ शय्याका आधारभूत अस्पताल निर्माण गर्ने निर्णय गर्नुभएको हो ।

यसअघि गत मंसिर १५ गते स्वास्थ्य मन्त्रालयले अस्पताल तथा स्वास्थ्य संस्था नभएका ३९६ वटा स्थानीय तहमा एकैसाथ अस्पताल निर्माणको काम सुरु गरेको थियो। शुक्रबार साँझ प्रधानमन्त्री केपी शर्मा ओलीले ८ जना मन्त्री र एक जना राज्यमन्त्री नियुक्त गरेपछि पुराना मन्त्रीहरूको पनि जिम्मेवारी हेरफेर गरिएको थियो।

योसँगै यसअघि सामान्य प्रशासन मन्त्री रहनु भएका त्रिपाठी स्वास्थ्यमा आउनु भएको हो भने यसअघि स्वास्थ्यमन्त्री भानुभक्त ढकाल पर्यटन मन्त्रालयमा जानु भएको छ ।