ओलीले निकै ठूलो छलाङ मार्न खोज्नु भएको छ : प्रकाश चन्द

चितवन, ११ पुस । प्रतिबन्धित नेकपाका महासचिव नेत्रविक्रम चन्द विप्लवका छोरा डा. प्रकाश चन्दले प्रधानमन्त्री केपी शर्मा ओलीले नेपाली राजनीतिमा निकै ठूलो छलाङ्ग मार्न खोजेको बताउनु भएको छ । शनिबार पत्रकारहरुसँग कुरा गर्दै उहाँले ओलीको यो योजना सफल भए देश समृद्धिको बाटोमा अगाडि बढ्ने बताउनु भएको हो ।

आफु संसद पुनस्र्थापना नहोेस् भन्ने पक्षमा रहेको भन्दै उहाँले भन्नुभयो “अहिलेको राजनीतिक घटनाक्रमले जनतामा एकखाले उत्साह जगाएको छ ।” चन्दले प्रधानमन्त्री ओलीले संसद विघटन गरी राम्रो काम गरेको बताउनुभयो । सर्वोच्च अदालतले संसद पुनस्र्थापनाको पक्षमा फैसला नगरी ओलीको निर्णयलाई सदर गरेर अगाडि बढे देश राजनीतिक रुपमा एउटा फरक कोर्समा अगाडि बढ्ने उहाँको भनाई थियो ।

संसद विघटनले देशलाई धेरै आर्थिक भारबाट समेत बचाएको उहाँको भनाई छ । उहाँले भन्नुभयो “राजनीतिक रुपमा जुन ढंगले जुन परिस्थितिले संसद विघटन भएको भएपनि यो ब्यवस्था परिर्वतनको सार्थक संकेत हो । अहिलेको अवस्था सृजना गर्नमा ओलीले धेरै ठूलो आँट गर्नुभएको छ ।”

संसदीय भागबण्डाले मुलुक चल्दैन भन्ने धारणा विद्रोही नेकपाको भएको र ओलीले पनि त्यही नीतिलाई अंगीकार गरेकोले यसले कालान्तरमा ब्यवस्था परिर्वतनका लागि बाटो खोलेको उहाँको भनाइ छ । उहाँले सरकारी अस्पतालमा काम गरी गरिब, विपन्न नागरिकको उपचार गर्ने चाहना आफ्नो रहेको बताउनुभयो ।