चितवनमा संसद विघटनको विरोध प्रदर्शन

चितवन, ५ पुस । संसद विघटनको विरोधमा सत्तारुढ नेपाल कम्युनिष्ट पार्टी (नेकपा) कै कार्यकर्ताहरुले चितवनमा प्रदर्शन गरेका छन् । नेकपाका प्रचण्ड–नेपाल पक्षका कार्यकर्ताहरुले आज (आइतबार) दिउँसो भरतपुरको चौबिसकोठीमा प्रदर्शन गरेका हुन् ।

उनिहरुले संसद विघटन खारेज गर्न माग गर्दै प्रधानमन्त्री केपी शर्मा ओलीविरुद्ध चर्को नाराबाजी गरेका थिए । भेलालाई सम्बोधन गर्दै युवा संघका जिल्ला संयोजक मधु न्यौपानेले प्रधानमन्त्री ओलीले सिफारिस गरेको संसद विघटन प्रस्ताव संवैधानिक ‘कू’ भएको भन्दै खारेजको माग गरे ।

मन्त्रिपरिषद्को सिफारिसमा राष्ट्रपति भण्डारीले आइतबार दिउँसो संसद विघटन गरेकी हुन्। राष्ट्रपतिको कार्यालय शितल निवासले विज्ञप्ति जारी गर्दै संसद विघटन गरेको जानकारी दिएको छ। साथै, आमनिर्वाचनको मितिसमेत तोकिएको छ । आज बिहान बसेको मन्त्रिपरिषद् बैठकपछि प्रधानमन्त्री ओलीले संसद विघटन गर्ने प्रस्ताव राष्ट्रपतिसमक्ष लगेका थिए । राष्ट्रपती विद्यादेवी भण्डारीले मन्त्रिपरिषद्को सिफारिस बमोजिम ताजा जनादेशका लागि २०७८ वैशाख १७ गते पहिलो चरण र २७ गते दोस्रो चरणमा प्रतिनिधिसभाको निर्वाचनसमेत तोकेकी छन् ।