स्थायी कमिटी बैठकमा प्रधानमन्त्री उपस्थित नहुने, बैठकअघि नै ओली-दाहाल छलफल

काठमाडौँ , १ पुस । सत्तारुढ नेपाल कम्युनिस्ट पार्टी (नेकपा) को स्थायी कमिटी बैठकमा प्रधानमन्त्री ओली उपस्थित नहुने भएका छन् । प्रधानमन्त्री निवास बालुवाटारमा १ बजेका लागि निर्धारित बैठकमा ओली उपस्थित भएका छैनन् ।

बैठकका लागि अधिकांश स्थायी कमिटी सदस्य बालुवाटार पुगिसकेका छन्। ओलीले केहीबेर अघि अर्का अध्यक्ष पुष्पकमल दाहालसँग भेटेका थिए । दुई अध्यक्षको भेटमा प्रधानमन्त्रीले प्रचण्डसमक्ष आजको कार्यसूचीको बारेमा सोधेका थिए। जवाफमा प्रचण्डले मैले राखेको राजनीतिक प्रतिवेदनमा छलफल हुन्छ भनेपछि प्रधानमन्त्रीले उक्त छलफलमा सहभागिता हुन नसक्ने बताएका छन् ।

गएको मंसिर २१ देखि शुरु भएको स्थायी कमिटी बैठक चलिरहेकै अवधिमा ओलीले मंगलबार अध्यादेश ल्याए पछि प्रचण्ड, वरिष्ठ नेता माधवकुमार नेपालसहित सचिवालयका पाँच नेताको बैठक मंगलबार खुमलटारमा बसेको थियो । मंगलबार मात्रै संवैधानिक परिषद्सम्बन्धी अध्यादेश जारी भएकाले आजको स्थायी कमिटी बैठकमा ओलीको आलोचना हुने बताईएको छ ।