क्रिकेट रङ्गशालाका लागि प्रदेश सरकारबाट सक्दो सहयोग गर्छौँ : मन्त्री ढुङ्गेल

चितवन । प्रदेश ३ का आर्थिक मामिला तथा योजना मन्त्री कैलाश ढुङ्गेलले भरतपुर महानगरपालिका वडा नम्बर १५ मा निर्माणधीन गौतमबुद्ध अन्तर्राष्ट्रिय क्रिकेट रङ्गशालाको निरीक्षण गर्नुभएको छ ।

मन्त्री ढुङगेलसहित यस क्षेत्रका प्रदेशसभा सदस्य कृष्णप्रसाद भुर्तेल, अर्का प्रदेशसभा सदस्य विजय सुवेदी, उद्योगी डाक्टर तिलचन्द्र भट्टराई सहितको टोलीले निर्माणाधीन रङ्गशाला निरीक्षण गर्नुभएको हो । निर्माणधीन रङ्गशालाको बारेमा मन्त्री ढुङ्गेललाई धुर्मुस सुन्तली फाउण्डेशनका प्रतिनिधि चन्द्र खड्का तथा क्युरेटर कमल पाण्डेले जानकारी दिनुभएको थियो । रङ्गशाला निरीक्षणको क्रममा मन्त्री ढुङ्गेलले चितवनमा निर्माण भइरहेको क्रिकेट रङ्गशाला प्रदेश ३ को मात्रै नभएर नेपालकै गौरब भएको बताउनुभयो ।

रङ्गशाला निर्माणका लागि प्रदेश सरकारको भूमिकाअनुसार सहयोग गर्ने मन्त्री ढुङ्गेलले प्रतिवद्धता व्यक्त गर्नुभयो । उहाँले भन्नुभयो, ‘डीपीआर सकेपछि हामीलाई जे भूमिका दिइन्छ सोही अनुसार प्रदेश सरकारले रङ्गशाला निर्माणका लागि सहयोग गर्छ ।’ समयमा नै रङ्गशाला निर्माण सम्पन्न गर्नका लागि प्रदेश सरकारको तर्फबाट सक्दो सहयोग गर्ने उहाँले बताउनुभयो ।

सोही क्षेत्रका प्रदेशसभा सदस्य कृष्णप्रसाद भुर्तेलले गौतमबुद्ध अन्तर्राष्ट्रिय क्रिकेट रङ्गशालाका लागि आफूले १० करोड रुपैयाँको योजना प्रदेशसभामा पेस गरेको जानकारी गराउनुभयो । डीपीआर निर्माणको चरणमा रहेको उक्त रङ्गशालाको काम आगामी भदौमा शिलान्यास गरेर अगाडि बढाउने तयारी थालिएको छ ।