जंगली हात्तीको आक्रमणबाट चेपाङको मृत्यु

चितवन । जंगली हात्तीको आक्रमणबाट चितवन राष्ट्रिय निकुञ्जमा एक जनाको मृत्यु भएको छ । निकुञ्जभित्र घाँस काट्ने जाने क्रममा राप्ती नगरपालिका वडा नं. १ बस्ने ५० वर्षिय आईतबहादुर चेपाङको मृत्यु भएको हो ।

जिल्ला प्रहरी कार्यालय चितवनका अनुसार ४० वर्षिय श्रीमती विष्णुमाया चेपाङसहित निकुञ्जको पूर्वी सेक्टर अन्तरगत दोभान नजिक घाँस काट्न गएका उनलाई हात्तीले आक्रमण गरेको थियो । उनकी श्रीमती भने बच्न सफल भएकी छिन् । घटना लगत्तै श्रीमती र आफन्तले शवलाई घर ल्याएका थिए । उक्त शव परीक्षणको लागि भरतपुर अस्पतालमा ल्याईएको प्रहरीले जनाएको छ ।

चितवन राष्ट्रिय निकुञ्जले निज व्यक्ति कुनै किसिमको अनुमति तथा जानकारी बिना नै निकुञ्जको कोर ईलाका प्रवेश गरेको जनाएको छ । यो सँगै निकुञ्ज र आसपासका क्षेत्रमा वन्यजन्तुको आक्रमणबाट चालु आवमा मृत्यु हुनेको संख्या ५ पुगेको छ । सो मध्ये ३ जना बाघको आक्रमणबाट, एक जना गैँडाको आक्रमणबाट र एक जनाको जङ्गली हात्तीको आक्रमणबाट मृत्यु भएको हो । यसअघि निकुञ्जको कोर ईलाकामा घरपालुवा हात्तीको आक्रमणबाट राष्ट्रिय प्रकृति संरक्षण कोषका माहुतेको समेत मृत्यु भएको थियो ।