राप्ती घटनाप्रति नेकपा चितवनको ध्यानाकर्षण

चितवन । नेपाल कम्युनिष्ट पार्टी (नेकपा) चितवनले पूर्वी चितवनको राप्ती नगरपालिकामा शनिबार भएको घटनाप्रति गम्भीर ध्यानाकर्षण भएको जनाएको छ । पार्टीले आज आईतबार एक विज्ञप्ति जारी गरी घटनाप्रति ध्यानाकर्षण भएको जनाएको हो ।

जारी विज्ञप्तिमा पार्टीका स्थायी कमिटी सदस्य एवं चितवन क्षेत्र नं. १ का प्रतिनिधिसभा सदस्य सुरेन्द्र पाण्डे उपस्थित कार्यक्रममा होहल्ला भएकोप्रति गम्भीर ध्यानाकर्षण भएको जनाईएको छ । पार्टी जिल्ला अध्यक्ष यमबहादुर परियार ‘इन्द्रजीत’ र सचिव कृष्णभक्त पोखरेलले हस्ताक्षर गर्नुभएको विज्ञप्तिमा राप्ती नगर कमिटीको तेस्रो बैठकमा पाण्डेले सम्बोधन गरिरहेको अवस्थामा कमिटीमा नै नरहेका बाहिरबाट आएका व्यक्तिहरुले होहल्ला गरी बैठक बिथोल्न खोजेको जनाईएको छ ।

विज्ञप्तिमा भनिएको छ “पार्टी नगर कमिटीको औपचारिक बैठक बसिरहेको अवस्थामा र राप्ती नगरभित्रको विकास निर्माणसम्बन्धी छलफल रहेको अवस्थामा गरिएको अभद्र व्यवहारप्रति जिल्ला कमिटी खेद व्यक्त गर्दछ ।” घटनामा संलग्न व्यक्तिहरुलाई छानविन गरी पार्टी विधानबमोजिम कारवाही गरिने जनाईएको छ ।