सुरेन्द्र पाण्डेको आफ्नै निर्वाचन क्षेत्रमा भएको कार्यक्रमा कार्यकर्ताद्वारा होहल्ला र नाराबाजी

चितवन । जिल्लाको राप्ती नगरपालिकामा नेकपा स्थायी कमिटी सदस्य तथा पूर्वअर्थमन्त्री सुरेन्द्र पाण्डे प्रमुख अतिथिको रहेको कार्यक्रममा गुटको राजनीति गरेको भन्दै नेकपाका कार्यकर्ताहरुले होहल्ला र नाराबाजी गरेका छन् । नेकपा राप्ती नगरकमिटीले शनिबार वीरेन्द्रनगरमा गरेको कार्यक्रममा सुरेन्द्र पाण्डेले पार्टीमा देखिएको विवाद समाधानमा पार्टीबाट गठित कार्यदलको भूमिका बारेमा बोलिरहँदा होहल्ला र नाराबाजी भएको हो ।

राप्ती नगरकमिटीका नगरइन्चार्ज मानबहादुर स्याङ्बोले भन्नुभयो “सुरेन्द्र पाण्डेले पार्टी कार्यदलले मदन भण्डारी फाउण्डेसनको गतिविधि अहिलेलाई स्थगित गर्नुपर्छ भनेर सिफारिस गरेको भन्ने जानकारी गराउनासाथ होहल्ला भयो । कार्यक्रम सञ्चालन गर्न सकिएन र स्थगित गर्नुपर्ने बाध्यता पर्‍यो ।”

त्यसैगरी राष्ट्रिय युवा संघ नेपाल निर्वाचन कमिटीका सदस्य केदार आचार्यले प्रधानमन्त्रीका विरुद्ध निरन्तर बोल्न थालेपछि होहल्ला गरेर बोल्न नदिएको बताउनुभयो । उहाँले भन्नुभयो “मदन भण्डारी फाउण्डेसनलाई गुटबन्दी गरेको आरोप लगाउँदै विरोध गर्न थालेपछि ४५ जना युवाहरुले उहाँलाई बोल्न नदिएको हो । हामीले बोल्न नदिएपछि प्रहरीले सुरक्षा दिएर लग्यो ।” उहाँले पार्टीको कार्यक्रममा गुटबन्दी गर्दै हिडेमा चितवनमा उहाँलाई कुनै पनि कार्यक्रममा बोल्न नदिने चेतावनी पनि युवाहरुले दिएको आचार्यले बताउनुभयो ।

शनिबार दिउँसो नेकपा जिल्ला पार्टी कार्यालय भरतपुरमा आयोजित कार्यक्रमा पाण्डेले पार्टीले कुनै पनि फाउण्डेशनका नाममा गतिविधि नगर्न निर्देशन गर्दैगर्दै गतिविधि भएको बताउनुभयो । उहाँले पार्टी विभाजन भएमा प्रधानमन्त्री केपी ओलीलाई सबैभन्दा बढी चोट लाग्ने ईंगित गर्दै भन्नुभयो “पार्टी विभाजन भयो भने सबैभन्दा अग्लो ठाउँमा रहेको व्यक्तिलाई सबैभन्दा ठूलो चोट लाग्छ ।”