सरकारसँग सहमतिपछि डा. केसीले तोड्नुभयो अनसन

काठमाडौं । डा गोविन्द केसीले कोरोना संक्रमण भई निको भएका सफाइ कर्मचारीले जुस पिलाएर आईतबार अनसन तोड्नु भएको छ । उहाँले १९ औं आमरण अनशन तोड्नु भएको हो । शनिबार राति सरकारसँग ८ बुँदे सहमति भएपछि डा केसीले २८ औं दिनमा अनशन अन्त्य गर्नुभएको हो ।

डा केसीले त्रिवि शिक्षण अस्पतालका सफाइ कर्मचारी विकास नेपालीको हातबाट जुस पिएर अनसन तोड्नु भएको हो । ४६ वर्षीय नेपालीलाई कोरोना संक्रमण भएर निको भएको थियो ।

चिकित्सा शिक्षा सुधारका बिभिन्न मागहरु राख्दै डा केसीले गत २९ भदौदेखि जुम्लाबाट १९ औं अनशन सुरु गर्नुभएको थियो । उहाँलाई आठौं दिनमा काठमाडौं ल्याइएको थियो । उहाँलाई त्रिवि शिक्षण अस्पतालको कोठा नं ५०१ मा राखिएको थियो ।

उहाँले अनशन तोडनुअघि प्रधामन्त्री केपी शर्मा ओली, सरकारी वार्ता टोली, शुभचिन्तक तथा सहयोगीलाई धन्यवाद दिनुभएको थियो । अनशन तोड्नुअघि डा केसीका सहयोगी प्रितम सुवेदीले सरकारसँग भएको ८ बुँदे सहमति पत्र पढेर सुनाउनु भएको थियो ।

शनिबार राति त्रिवि शिक्षण अस्पतालमा डा केसी र सरकारी वार्ता टोलीका संयोजक तथा शिक्षा सचिव गोपीनाथ मैनालीले ८ बुँदे सम्झौतापत्रमा हस्ताक्षर गर्नुभएको थियो ।