तीन दिनपछि बाघको आक्रमणबाट अर्काे एक जनाको मृत्यु

चितवन । चितवन राष्ट्रिय निकुञ्ज आसपासको मध्यवर्ती सामुदायिक वनमा बाघको आक्रमणबाट तीन दिनपछि अर्का एक जनाको मृत्यु भएको छ । शनिबार पश्चिम चितवनमा बाघको आक्रमणबाट एक जनाको मृत्यु भएको थियो भने सोमबार पूर्वी चितवनमा मृत्यु भएको हो ।

मृत्यु हुनेमा रत्ननगर नगरपालिका वडा नं. ६, का ५५ वर्षिय बबना चौधरी रहेका छन् । चितवन राष्ट्रिय निकुञ्जका सूचना अधिकारी सहायक संरक्षण अधिकृत अशोक रामका अनुसार स्थानीय कुमरोज मध्यवर्ती सामुदायिक वनमा हात्ती चराउन जाँदा उनलाई बाघले आक्रमण गरेको हो । हात्ती चराउँदै घाँस काट्ने क्रममा बाघले आक्रमण गरेको जनाईएको छ ।

जरायो मारेर शिकार गरिरहेको अवस्थामा उनी घाँस काट्न त्यहाँ पुगेपछि बाघले एक्कासी आक्रमण गरेको रामले जानकारी दिनुभयो । मृतकको शव घटना स्थल नजिकै फेला परेको प्रहरीले जनाएको छ ।

यस अघि गत शनिबार पश्चिम चितवनमा पनि बाघको आक्रमणबाट एक जनाको मृत्यु भएको थियो । आक्रमणपछि शव समेत नछाडेपछि डार्ट गरेर आक्रमण गर्ने बाघलाई निकुञ्जले नियन्त्रणमा लिएको थियो । उक्त बाघलाई निकुञ्जको कार्यालय कसरामा राखिएको छ ।